Iraq Khrihmi hna tlangbawi a simi Father Martin nih a chimmi cu ISIS cungah Pathian vel aa phuan khawhnak hnga caah Iraq Khrihfami hna nih ISIS caah thla an cam lengmang. Jesuh Khrih nih nan ral va daw hna u a ti bantukin ISIS caah thlacampiak an ngol lo a ti.
ISIS nih chungkhar an then, bawhte le a nu a then hna, pa le fa an thenter hna, nu le fanu an thenter hna. An dawt tukmi an ta, an far, an nu, an pa, le an chungkhar tiang in an hloh dih hna. An temtuar ning le an lungthin a kuai ning hi hmurka in chim khawh a si lo. Asinain Jesuh Khrih ruangah ISIS tbk minung hmanh thla an campiak kho hna.
2014 ah ISIS nih Iraq in chaklei peng an lak in Khrihfami hna zeimawzat cu an zam hna i Erbil i Chaldean Catholic Church ah Father Martin sinah an um hna. Atu tiang ah family 300 hrawng an um. An harsat ning le an tuar ning hi zaangfak tuk an si a ti.
Ithara Assis hi fa pathum a ngeimi a si i, a khua ah kir i nuam tein khuasak le um a duh tuk cang. Zeitik in dah Mosul hi an lak khawh te lai timi lawng a hngak vemi a si. Martin nih a chimmi cu 'Khrihfami hna nih kan tonmi harnak hi a fak tuk i, hmailei caah ruahchannak hmanh kan ngei tawn lo nain kan zumhnak a thawng peng ko' a ti.
'An harsat nih an zumhnak hi a thawnter chinchin. Thlacam lawng te an rian hna. ISIS cungah Pathian zaangfahnak aa phuan i, mi tha an sinak ding ca zong ah thla an campiak hna. An chcungkhar ca tiang in thla an campiak hna a ti. 'Iraq caah cite kan si. Kan ram caah ruahchannak phurtu kan si tiah Father Martin nih a chim. Ref: Christian Times.