Cubu president thing Fedel Castro cu a thi cang tiah President Raul Castro nih state TV in thawngthanhnak a tuah. Fidel hi a sau bik hruaitu rian a tuanmi pakhat zong a si i, harasatnak le dohnak phun kip chungin tleng lak tiang cho a chuak khomi hruaitu a si.
Cuba cozah cu 1959 ah Fidel Castro nih a rak thlak i communist uknak a rak chuah pi. Chan pi chan hnih leng tiang US a doh i, an tangah a kun duh lomi pa a si. Voi tam tuk thah an timh i, a luat lengmangmi zong a rak si. Cuba mipi nih cun Fidel nih cozah a lak i, mipi kut ah a kan pe thantu a si an ti.
A nau a simi President Castro nih TV in mipi sinah zahan zan ah thawngthanhnak a tuah. Nirukni zanlei ah a ruak kan khangh lai a ti. Raul Castro nih thawngthanhnak a tuah i a donghnak ah a chimmi cu 'zungzal in teinak leiah' a ti.
April ah khan Communist Party Congress ah Fidel Castro nih bia a chim. 'A rauh hlanah kum 90 ka tling cang lai. Hi tiang kan phan lai timi kaa ruah bal lo' a ti. 'A rauh hlanah keimah zong midang cio bantuk ka si lai. Kan caan an phan cio lai' a ti. Kum zabu 20 ah Cuba bawi chungkhar a si lomi chung in hruaitu sau bik a tuanmi a si.
2006 ah khan a nawlngeihnak cu a nau Raul Castro sinah a pek. 2008 ah Raul Castro cu Cuba president a vun si.
Zeitin dah US a rak doh ning a si? Cold War chung vialte kha Washington caah Fidel Castro hi hling bantuk a rak si. 1959 ah a ralkap tlawmpa te he Cuba ralkap hruaitu Fulgencio Batista cu a rak thlak i, ramchung nawlngeihnak a tlaih. Kum hnih chungah an cozah dohnak cu Marxist-Leninist tiah an au i, Soviet Union he pehtlaihnak fek tuk an ngei.
US nih economic pehtlaihnak a phih i, dong loin Cuba tuk i lak a timh lengmang ko nain a thazaang an der kho lo i, a cozah dohnak cu thawng tuk in a dirpi thiamthiam. US he in meng 90 lawng aa hlatmi an si. Cuba a hruai chungah hin US President minung 10 an i thleng manh. CIA nih voi tam tuk thah an rak timh i, a luat lengmangmi pa a si.
Vawleicung Nih A Thihnak Bia An Chimmi
Latin America leiin Mexican President Enrique Pena Nieto nih 'Castro cu kan hawi tha a si' a ti; Ecuador President Salvador Sanchez Ceren nih cun 'zungzal kan hawi a si a ti; Venezuela President Nicolas Maduro nih cun vawleicung cozah dohtu hna paoh nih a nehnang kan zulh ding a si' a ti ve.
Soviet Union hruaitutu thing Mikhail Gorbachev nih cun 'US nih fak tuk in an ralchanh lioah Fidel a dir i, a ram thazaang a pek hna' a ti. Miami ah cun Cuba Community an um i, Castro a thih thawng an lung a lawmhter hna i, puai an tuah ve. Ref: BBC.