Hi tlangtar tangah theology sullam fianternak, Khrihfami kan theology fianternak, then ning le ser ning, zeitin dah theology an ser i, ahodah theology sertu hna an si ti bantuk, cun Laimi nih theology kong kan chim tawnmi le kan theology taktak hi aa dang sual maw ti biahalnak, theology kan fian lo ruang le kan theih lo ruangah theology hi kan doh sual maw, theological theihhngalhnak ngeih lo hi zeitluk in dah a rak poi i, zeitluk fak in dah kan Khrihfabu, pumpak nunnak le society a hrawh ti bantuk, zeidah Laimi kan thazaang dernak an si i, zeitin dah thazaang kan lak than lai timi kan zoh hna lai.
A. Theology Fianternak
Theology timi cu biafang pahnih fonhmi biafang pakhat a si i, cun sullam dangdang a ngeimi biafang pahnih kha biafang pakhat fonh i, sullam pakhat a ngeimi ah ser a si. ‘Theos’ timi cu Greek holh a si i ‘Pathian’ tinak a si; Logy kan timi cu Greek holh in ‘logos’ ti a si i, ‘bia’ a si loah ‘bia in a siah catial in a siah thil pakhatkhat kong kherhlainak’ ti a si, cucaah theology timi cu Pathian kong kherhlainak/cawnnak’ ti a si. Millard J. Erickson (Christian Theology, p. 22) nih cun ‘theology timi cu Pathian kong cawnnak’ a tiin a fianh i, Charle C. Ryrie (Basic Theology, p. 9) nih cun ‘theology timi cu Pathian kong ruah khi a si ko, cu kan ruahmi cu lam pakhatkhat poah in langhter kha a si’ a tiin a fianh ve.
Theology fianternak hi a rak kau ngai. Khrihfami biaknak lawng a huap lo. Vawleicung ah biaknak 4,200 hrawng an um ti a si i, a tlangpi in biaknak kip nih pathian an ngei cio hna. An pathian cio an pehtlaihnak ding ah hrambunh an ngeih cio. Cheukhat nih cun kokek thil zoh in Pathian a um ti an theih; kokek thil umtu ning in theology an ser i, an pathian cu an pehtlaih. Muslim nih Quran charhchan in theology an ser i, an Allah pehtlaihnak caah an hman. Khrihfami nih Pathian pehtlaihnak caah Bible cu kan zumhnak hrampi le kan theology ah kan ser ve. Pathian/pathian kan ruahnak le kan pehtlaihnak hram cu Pathian/pathian nih a kan pek tiah kan zumhmi Bible/Quran/ Kokek thil hna kha an si. An dawng tein theology fianternak tangah an i tlum dih.
Cucaah Khrihfami nih theology kong kan chim tikah paoh Bible-Based in sermi theology lengmang kha a si lai. Khrihfami theology hi a rum ngaimi a si tikah fiang deuh in kan langhter lai. A tanglei hi kan theology then ning, ser ning, thancho ning an si lai.
B. Kan Theology Then Ning
The Moody Handbook of Theology ah Paul Enns nih a tanglei bantukin kan theology cu a then hna:
1. Biblical Theology
Biblical theology hi zabu hleiriat le hleikua in biatak tein a chuak. Liberalism le Neo-Orthodoxy nih Bible an hmuh ning kha Pathian leikam si loin minung ser menmen bantuk ah an chiah tikah Bible Nawlngeihnak (Pathian thawchuah = authority of the Scripture) kha an cohlang ti lo, cu tikah Bible fianternak tuah kha san a tlaihnak a um ti lo. Cu ruangah Biblical theology movement timi biatak tein a chuak. Biblical Theology nih aa tinhmi hna cu:
a) Bible catialtu chan le zumhnak vialte an kherhlai dih hnuah systematic tein langhter.
b) Bible catialtu dirhmun biatak tein theih khawh aa zuam. Biakam Hlun ah zeitin dah Pathian biaphuan an don ning a si, Biakam Thar ah zei bantuk dirhmun in dah Lamkaltu hna nih cakuat an tial timi vialte an zoh dih.
c) Pathian hi minung sinah voikhat ah aa phuang dih lo; caan khat hnu caan khat in minung dangdang sinah aa phuang i, cuticun Pathian kong kan theih. Chan khat le caan khat aa phuan ning kha aa dang lengmang. Noah sinah aa phuan ning le Abraham sinah aa phuan ning aa khat lo; Isaiah sinah aa phuan ning le Daniel sinah aa phuan ning aa dang; cu vialte hna cu Biblical theology nih a kherhlai dih.
d) Systematic theology nih cun Pathian kong a kherhlai tikah Bible pinah lenglei charchan a hman chih; asinain Biblical theology nih cun Bible nih zeidah a chim duhmi a si tiah catialtu lungthin theihpiak kha Biblical theology nih cun a biapi tuk ah a chiah.
e) Biblical theology ah a biapi cemmi cu ‘exegesis’ (Bible hrilfiah) timi hi a si. Biblical theology thawn le dernak cu ‘exegesis’ cungah aa hngat. Exegesis ah hin ‘Bible kha literal-grammatical-historical zoh chih dih an si. Hi rian hi a fawi lo taktakmi a si.
Bible cu Pathian thawchuahmi le a nungmi bia a si caah grammatical hman ning tha tein an kherhlai, historical back ground an kherhlai dih, Bible nih a chimmi paoh kha a si khawh chung in a chim ning (literal) tein an lakpiak, biafang sullam an kherhlai dih hnu le an sullam an theih dih hnuah sermi theology a si. Cu tikah a thiangmi theology ti zong in an auh.
2. Systematic Theology
Systematic timi cu thil pakhatkhat kha hmun khat ah ningcang tein ser or fun or chiah ti a si. Doctrine pakhat kong (tahchunnak ah Pathian kong) chim an duh tikah, Bible (Gen. – Biathlam) nih zeitin dah an chim cio timi kha information tling tein lak dih hnuah systematic tein fianter le langhter kha Systematic theology kan timi cu a si. Biblical theology he Bible an zoh ning aa khat dih nain an i dannak cu Systematic theology ah cun Bible lawng bochan loin a lenglei charchan tampi a zoh chih. Chan tiluan khuacuanh ning, hmuh ning le zatlangnun hna kha kan theology he then awk tha loin bia a ruahter hna. Cun Systematic Theology hi kan zumhnak (doctrine) he then awk tha loin aa tlaimi a si bantukin kan zumhnak (doctrine) a fiantertu le a rungveng tu bik tiah ruahmi zong a si.
Systematic theology ser ning cu a tanglei bantukin an si: Theology Proper or Taterology: Pathian kong cawnnak ti a si i, Genesis in Biathlam tiang ah zeitin dah Pathian kong aa tial ning a si; ahodah kan Pathian a si; zei bantuk ziaza dah a ngeih etc, ti bantuk kha systematic tein fianter le langhter kha Systematic theology rian cu a si. A tanglei zong an i khat dih cang. Christology (Jesuh Khrih kong cawnnak); Pneumatology (Thiang Thlarau kong cawnnak); Bibliology (Bible kong cawnnak); Anthropology (Minung kong cawnnak); Harmartiology (Sualnak kong cawnnak); Soteriology (Khamhnak kong cawnnak); Angelology (vancungmi kong cawnnak); Eccelsiology (Khrihfabu kong cawnnak); Eschatology (Caan donghnak kong cawnnak); etc, hna an si.
3. Historical Theology
Historical theology timi cu chan kip chung i Khrihfami zumhnak theology, aa sem ning, a thancho ning le aa thlen ning ti bantuk zoh thannak hna kha an si. Kan zumhnak ah a biapi tukmi Pathian kong, Jesuh Khrih kong, Thiang Thlarau kong, khamhnak kong, Khrihfabu kong, caan donghnak kong etc, ti bantuk hna kha pacan hna nih zeitin dah an rak i fian ning le an rak zumh ning a si timi vialte kha Historical theology nih a thar in a zoh than hna. An thazaang dernak le thawnnak ti bantuk hna kha an langhter i, hmailei chan caah zoh than awk zeidah an si timi an langhter. A tanglei bantukin an i then ning cu an si:
a) Ancient theology (1st Century – A.D. 590): Hi chan chungah biapi in pacan nih an rak zohmi hna cu: Thumkomh Pathian kong, Jesuh Khrih hi Pathian taktak a si maw si lo timi kong, khamhnak kong etc, hna biatak tein fianternak an rak tuah; Bible zong biatak tein zohnak le fehternak an rak tuah; minung kong le sualnak kong zong biatak tein an rak zoh. Theological issues kongah buainak an ton chom tein phisin an rak si. Systematic tein sermi Theology tling an rak ngei rih lo.
b) Medieval theology (A.D. 590 – 1517): Muihnak chan (Dark Ages) ti zong in an rak auh, zeicatiah Khrihfabu ziknawhnak le thurhnomhnak in a rak khat; Mary sinah thlacamnak, Purgatory, pope ke hnamhnak, tlangbawi sinah sualphuannak etc, ti bantuk Roman Catholic theology tampi rak ser a si.
c) Reformation Theology (1517 – 1750): Hi chan nih Khrihfabu sersiamnak (reform) a vun tuah than. Bible lawnglawng tiin Bible ah ah kir thannak, zumhnak in thiamcoter kan sinak, zumtu kip kip tlangbawi kan sinak, Bawipa Zanriah kong etc, ti bantuk theology hna kha ser an si. Roman Catholic le Protestant theology an chuak, cun Chanthar (Modern) zong kahin aa thok.
d) Modern theology (1750 – tu chan tiang): Chanthar nih a chuahmi a tam ngai. Cu lakah Liberal theology hi a puah in an puak. Minung khuaruahnak le minung kha biapi bik ah chiah an si; Nunnak sullam (Meaning of life) hi Pathian ah um loin minung le a thil ti khawhnak ah a um an ti i, Bible le kan zumhnak hna kha an hlawt chin lengmang.
Khrihfabu tuanbia tiluan chungah sermi theology le ruahnak vialte hna kha Historical Theology nih a zoh than hna; an dernak le an thawnnak fiang tein a langhter. Nihin kan theology a thawntertu cu Historical Theology hi a si.
4. Dogmatic Theology
Dogmatic theology le systematic theology hi aa khat ah cheukhat nih cun an ruah tawn. Asinain dogmatic theology aa dannak cu Khrihfabu nih an zumhnak tlaihtleng (body of doctrine) an tialmi a si i, cucu Khrihfabu cungah si seh zumtu cungah a siah nawlngeitu a si. A hlanah cun cawnpiaknak deu a um lengmang caah Khrihfabu nih ‘creed’ or ‘dogma’ timi Khrihfabu doctrine or zumhnak tlaihtleng an rak ser. Cuticun Khrihfabu nih an rak i runven ning a rak si. Systematic theology cu Khrihfabu theng nih tial lo zong in pumpak kip nih kan zumhnak le theology kha systemtic tein tial khawhmi a si. Paul Enns nih Moody Handbook of Theology ah fiang ngaiin a tanglei bantukin a then hna:
a) Calvistic theology: Reformed/Calvinistic Khrihfabu zumhnak a si; John Calvin cauk ‘Institutes of the Christian Religion’ hrambunh in sermi a si.
b) Arminian theology: Jacobus Arminius theological hmuh ning le a cawnpiaknak aa hrawmmi Khrihfabu an si. Calvinism le Arminism hi tangkapia pakhat i, hmai khat veve an si. An theological hmuh ning hi aa ralkah ngaimi an si. Khrihfabu tuanbia ah biatak tein bia aa almi an si.
c) Covanant theology: Reformed Khrihfabu deuh nih an zumhmi a si i, Bible an hrilhfiah ning kong deuh zong a si fawn. Tahchunnak in kan chim ahcun, Reformed theologian nih cun Israel le Khrihfabu hi a dang veve in an hmu lo; Khrifabu nih Israel cu a rolh cang, cucaah Israel caah a dang tein Pathian nih program dang a ngei ti lo tiah an zumh. Asinain Dispensational theologian nih cun Israel le Khrihfabu kha aa dangmi an si zeicatiah Israel caah Pathian nih a dang tein program a ngeih ko rih ti an zumh. CT nih Bible an zoh tikah Pathian program pathum lawng an hmuh: Covenant of Work; of Redemption; and of Grace. DT nih cun Pathian program pasarih an hmuh ve. Bible an hrilhfiah ning aa dan tikah an zumhnak zong tampi aa dang. Hi hna pahnih Camp aa dannak cu Bible an hrilhfiah ning in a si.
d) Dispensational theology: C nak nih a fianh ngai ko.
e) Catholic theology: Catholic theology aa dannak cu zumhnak le nunnak ah nawlngeitu tiah an cohlanmi ah hin Bible, apocrypha cauk le tradition hna kha an si. Protestant nih cun Bible lawng an cohlan. Zungzal in Catholicism le Protestantism an i dannak cu hi ruang hna ah hin a si. Theology zong aa dang tukmi an si.
5. Contemporary Theology
A cunglei ah theology fianhnak kan tuah cang bantukin theology fianternak (definition) nih a huapmi a kau ngai. Contemporarty theology nih a vun fianter ngai cang. Contemporary theology hi zabu kul (20) in atu chan tiang ah a chuakmi theology hna an si. Cu hna cu: fundamental theology, neo-orthodox theology, Pentecostal theology, evangelical theology, neo-liberal theology, Post-Vatican II Catholic theology, Charismatic Movement etc, hna an si. Hi pinah tengngei fa deuh tete hna cu: liberation theology, feminist theology, Secular theology, Process theology, Social theology, Black theology, Liberal theology, Asian theology etc, hna an si.
Zabu kul hnu cun theology nih a tonmi a tam ngai cang. Minak (Black) nih anmah dirhmun hoih in theology an ser cang, nu hna nih anmah hoih in feminist theology an aupi cang, Asian nih anmah hoih in theology an aupi cang etc. Biaknak ruang, social ruang, science ruang le chan tiluan ruang in theology tiluan zong tampi aa thleng leng cang. Bible an hrilhfiah ning zong tampi aa thleng. Zabu kul hnu i theology tiluan theih hi a biapi ngaingai. Cheukhat nih cun Khrihfabu zumhnak le nunphung hmanh kha an hlawt hna i, chan thar zumhnak le hmuh ning a zulmi an tam cang. Biaknak dangdang le Khrihfabu karlak hmanh ah biaruahnak (interfaith dialogue) ngei in dirhmun khat (common ground) biatak tein kawl a si cang. Cu vialte cu Contemporary Theology nih a huap dih hna.
C. Theology Thanchon Ning
Nihin ah cun Khrihfabu nih systematic theology le doctrine tling kan ngei cang. Khrihfabu rak dirka ah a cunglei kan langhtermi hi an rak thei/ngei lo. Nihin ah kan zumhmi hi oral cun an rak zumh dih ve, asinain catial in an rak ngei lo. Caan nih a phak pi hna ning in theology an rak ser. Takchunnak ah Khrihfami pacan nih theological kongah buainak an rak ton hamsami cu Thum Komh Pathian kongah a si: Jesuh Khrih le Thiang Thlarau kong. Pacan hna nih biatak tein an kherhlai dih hnuah Jesuh Khrih le Thiang Thlarau cu Pathian ah Pathian bakte an si ko tiah fehter an rak si. Bible kong zong an rak buai than i, biatak tein an zoh dih hnu le an kherhlai dih hnuah Genesis in Biathlam tiang hi kan zumhnak le nunnak caah nawlngeitu Pathian thawchuahmi a si ko tiah cohlan a rak si.
Cun biapi ngai si ko nain theological issues fa deuh ah ruahmi: chuahkeh pimi sualnak, khamhnak hi zumhnak thawng in maw a si; tuahsernak aa tel chih maw ti bantuk, kum thongkhat pennak, zumtu hlornak, Khrihfabu hruainak, Jesuh Khrih thihnak hi thimmi ca lawng maw a si; mi vialte caah dah etc, ti bantuk tampi an um. Asinain Systematic Theology ah kan langhtermi hna chung i tengnge fa tete lawng te an si. Historical, Biblical, Contemporary le Dogmatic theology tiang in Systematic Theology nih a tlaih/huap chih dih.
D. Theology Ser Ning
Zeitin dah Khrihfami nih kan theology kan ser ning a si timi theih hi a biapi taktakmi pakhat a si. Theology fianternak (definition) kan pekmi nih cun theology hi kau piin a haup nain theology kan ser taktak tikah zeitin dah kan ser ning a si timi hi a rak biapi tuk. A cunglei ah Biblical, Historical, Systematic, Dogmatic le Contemporary theology kan langhtermi nih tampi a fianter lai. Theology hna hi zeitin dah kan ser ning hna an si ti theihnak nih kan theology a thatnak le bochan awktlak an sinak tampi bia an chim rih lai. Anmah le field cio in theology ser ning phung le lam an ngei cio. Hi nih hin kan theology a dawhter hna i, a sunlawiter hna. Theology sernak ding ah minung pakhat nih phung le lam zulh dingmi (rigorous discipline) tampi a ngeih pinah theology, Bible, philosophy, political, biaknak tiluan a thei taktakmi si a hau. Hi vialte he hin zeitik hmanh ah aa then thiam lomi le aa pehtlaihmi kan si tikah kan theology ser ning hi a biapi tuk. Erickson nih cun hitihin a fianter:
“kan theology nih kan zumhnak doctrine hna kha ningcang te, tling te, huap dih in a dotdot in ser khawh aa zuam; Bible charchan bik in a si; nunphung hoih in ser kha aa zuam, amah chan le caan hoih in biafang a hman i, ni fatin kan nunnak le theology kha pehtlaihter aa zuam” a ti.
A tanglei bantukin Millard J. Erickson nih Christian Theology ah theology ser ning kong a chimmi a tawinak in kan langhter lai:
1. Bible Caang Khawmhnak: Theology ser tikah kan duhmi tlangtar (doctrine) konghe aa pehtlaihmi Bible caang kha Genesis in Biatlam tiang khawmh hmasa ding. Bible caang kip kha ‘exegesis’ tuah hlanah a sullam kan theih khawhnak hnga a tha bikmi Bible tools (Bible dictionary, grammar, commentary le biafang lehlanak etc) le method (zulh phung le lam)hman a hau. Cu hnuah biafang kip kha ‘exegesis’ (fianter/hrilhfiah) tuah dih hnuah Bible catialtu duhnak, kha caan lio ah historical le cultural leiin dirhmun hna kha zeidah an si timi theih khawh zuam ding. Bible nih a chim duhmi chimter ding; kanmah nih kan ruahnak kha Bible chimter lo hrimhrim kha hihi nih aa tinhmi cu a si. Kan theology thawnnak cu hi cungah hin aa hngat bik.
2. Bible Caang Funnak: A pahnihnak ah a herhmi cu kan duhmi tlangtar (Pathian kong a si cun Pathian) konghe aa pehtlaimi Bible caang hna kha hmun khat ah fonh in tlangtar hoih in fianter ding. Bible tialtu karlak ah unity a umnak kha langhter i, an duhnak aa khahnak zong kha langhter ding. Tahchunnak ah Jesuh Khrih chuahkehnak or Bible kong chim kan duh tikah Biakam Hlun nih zeitin dah a chim i, Biakam Thar nih zeitin dah a chim ve; an chimmi ah Unity maw a um deuh, i kalhnak dah a um deuh timi kherhlai kha a si. Rem thipthep tein tungtlang ser.
3. Sullam Kherhlainak: Tlangtar konghe aa pehtlaimi ah Bible Unity kan hmuh hnuah a biapi ngaimi cu ‘mah nih hin zeidah a chim duh taktakmi a si?’ ti biahalnak tuah kha a si. Tahchunnak ah Khrihfabu cu ‘Khrih pum’ ti zong in kan auh i, Jesuh nih ‘hrinthan na hau’ a ti. A dangdang tampi an um len rih. Hi nih zeidah an chim duh taktakmi a si ti kha a sullam kherhlai taktak an hau. Kaa dangdang ah zeitin dah an chim cio; an biafang hmanmi aa khat lo hmanh ah ruahnak (idea) aa khatmi le aa neih deuhmi an um maw timi zoh dih le kherhlai dih hnuah a huap in biafunnak tuah a si; cu nih cun theological charhchan (argument) a thatter khun.
4. Historical Theology Zoh Chihnak: Theology sernak ah Historical Theology hi a biapi tuk fawn. Khrihfabu tuanbia tiluan chung vialte ah Khrihfabu cawnpiaknak le tlaihtleng vialte kha Historical Theology ah aa tel dih. Cu vialte cu theology ser tikah kherhlai dih le zoh than dih an si, cuticun Historical Theology a thawnnak le a dernak kha theology sernak caah thazaang le fimchimtu taktak a si.
5. Nunphung Dangdang Zohchihnak: Global chan ah kan um cang tikah miphun dangdang nunphung zoh chih lengmang zong a rak biapi. Mah nunphung lawng ah mitcawt i, miphun dangdang nunphun thei loin theology ser cu ri a ngei lomi Biatak hmetter a fawite.
6. Bible Pinah Lenglei Source: Theology hram taktak cu Bible a si nain Bible pinah lenglei source aa tel chih. Bible hi ‘Special Revelation’ kan ti i, ‘General Revelation’ a um rih, cucu chia-tha thleidannak kan ngeihmi te hna, sermi thil nih Pathian a um ti an langhter ning te hna etc, hna kha an si. Science zong in thathnemnak tampi kan hmuh rih. Bible nih minung kong zeimawzat a kan chimh lioah science zong nih a kan chimhmi tampi an um ve. Philosophy zong in ruahnak (idea) kan lakmi in thathnemnak tampi kan hmuh. Hi vialte hna hi theology nih a zoh chih dih hna i, theology kha chan kip ca a siah miphun kip ca a siah dotla in ser a si.
7. Aa Thleng Lomi Biatak Langhter: Bible hi nunphung dangdang a ngeimi hna sinah tial a si. Tahchunnak ah Korin le Philipi khua nunphung le dirhmun aa dang. Cu tikah anmah nunphun hoih le dirhmun hoih in tial an si tikah catialtu hna nih zei bantuk biatak dah an chim duhmi a si ti theih khawh le nunphun le biatak then thiam kha theology nih aa zuam. Aa thleng lomi (timeless truth) Pathian biatak kha nunphun le miphun pakhat ca menmen ah canter lo ding kha theology nih aa tinhmi a si.
8. Chan Hoih In Theology Ser: Aa thleng lomi Pathian biatak kha amah caan le chan hoih in langhter le fianter kha theology nih aa tinhmi a si. Chan khat hnu chan khat in minung kan nunphun le kan duhnak aa dang chin lengmang. Tu chan ko ah hin a zual khun. Nunphung fa deuhdeuh pawl cu a ngan deuh nih dolh a fawih tuk cang. Chan tiluan ruangah a si. Tahchunnak ah zabu hleikua ah cun minung khuaruahnak (reason) nih a ruah khawh lomi cu an hlawt hna; zabu kul tantim hrawng in cun minung khuaruahnak kha hlawt than in duhnak (willingness) menmen in an nung cang. ‘Biatak fianternak ding ah society nih khuaruahnak a herh tuk cang’ tiah Francis Schaeffer nih cun a rak ti. Cucaah cun aa tleng lengmangmi chan le caan hoih in aa thleng lomi Pathian biatak ser thiam kha theology rian a si.
9. Central Motif: Basket cu a tlaihnak in tlaih a si i, a pung in cawinak in a tlaihnak in cawi kha a zaang deuh. Cu bantuk cun capar kan tial tik le cauk kan tial tikah theme/central motif an ngei lengmang. Martin Luther theology funtu cu ‘Salvation by grace through faith’ ti a si i, John Calvin theology funtu cu ‘the Sovereignty of God’ ti a si; Millard J. Erickson theology funtu cu ‘the greatness of God’ ti a si etc. An theology tiluan sialtu le funtu caah theme/motif an ngei dih. Anmah nih an ser chommi si loin Bible le an theology an zoh tikah hihi Bible ah a lang bikmi theme/motif a si ko tiah an ruahmi a si; theological theme/motif ngeih hrimhrim ding.
10. A Dotdot In Chungum Ser: A donghnak ah theology ser ning methoh cu an fat le an ngan ning hoih in tlangtar/chung ser ding. Chungum tlangtar ngan bik kha roman number (I, II, II..) pek ding; a fa deuh kha capital letter pek ding (A, B, C ..); a fa deuh rihmi kha Arabic number (1, 2, 3..) pek ding; a fa chin rihmi kha small letter (a, b, c..) pek ding; a va fa chin rihmi kha small roman number (i, ii, iii..) pek ding etc. Chungum tlangtar a fat-ngan thleidan khawh le zeidah hmai a um lai i, zeidah hnuah a um lai ti bantuk thleidan thiam zong a rak biapi tuk.
Tahchunnak ah tlap thum hrawng in ‘Laimi le Theology’ tlangtar na kan tialpiak kho hnga maw tiah fial ka si tikah tlap kua-hra tal lo cun ka tial kho lai lo ka ti. Cheukhat nih cun tlap thum cung zong ah an tial khawh ko lai nain keimah nih cun ka ngamh lo, zeicatiah topic lian tuk a si. Topic le chungum a fat-ngan theih lo cu kan tial duhmi kong theih lo he aa khat.
E. Biahal Awk
A cunglei ah kan chimmi vialte hna hi kan theology le ser ning kong hngalhternak (introduction) menmen lawng an si rih. Zei tlukin dah theology hmuh/ser a har kha hngalhternak kan tuahmi nih tampi a fianter. Zei tlukin dah theologian thatha le khuaruat kho hna nih theology ser ah caan le nunnak an rak pek timi a langhter. Laimi nih ‘theology’ kan timi hi zeidah a si? Theology kong kan chim tikah zeidah kan mitthlam ah kan chiahmi a si? Theology kan chim tikah Bible he kan danter sual maw? Theology kan chim tikah minung fimnak sawhsawh bantuk ah kan ruat sual maw? Kan theology hi kan fiang taktak hna maw? Theology sertu hna hi zaaran minung zong an si lo; minthang university le college ah minthang le thluak tha bik le pumpek nun a ngei bik zong an si ti hi kan philh hna lo ding a si.
*-------------------------------*