Billionaire, mirum taktak pa Donald Trump nih President a vun tlin tikah khuaruat kho paoh le mi tam deuh nih cun American mipi le ram naak in a business zawn a ruat deuh te lai an ti. Mipi lungawtawm ngaiin an um lioah fianternak a vun tuah.
President thimmi Donald Trump nih fiang tein a chim lo nain hmai thla i press conference an ngeih dingmi ah hin ka riantuan dingmi tam deuh ka chim te lai a ti. A chim chihmi cu mipi nih lunghrinhnak an ka ngeihmi ka hrial lai i, ka business hi ka chiah tak lai i, president rian tu hi biatak thlak in ka tuan lai a ti.
Tweet ah a tialmi cu 'December 15 ah New York City ah ka fale he a biapi ngaimi conference kan ngei lai i a ning piin ka business ka kal tak dingmi kong kan ceih lai. America ka lianganter than khawhnak ding caah president rian ah hin tling tein ka pumpe lai' a ti.
A chim thanmi cu 'upadi ruangah ka tuanmi si loin a biapi tuk tiah ka ruah caah a si lai. Ka pumpak business zawnruahnak hrimhrim aa tel lo' tiah a chim. 'President rian hi a let in a biapimi rian a si' tiah a chim chih.
Trump nih tuan deuh ah a rak chimmi cu ka business hi ka fale Ivanka, Eric le Donald Jr. sinah ka chiah lai a ti. Anmah hi a business chungah riantuan cangmi a si. Trump nih Inn Raang pi ah Chief of Staff a tuan ding in a thimmi Reince Preibus nih cun 'an business kong chim ding in kaa tim rih lo. Mi thiamthiam tampi a ngei ko hna' tiah a chim. Ref: BBC.