By
Chin Ram Tlaangram Saram Le Tiva Nga Bu
Na kut kan in tlaih. Na miphun thawng chin lengmang le thangcho chin lengmang in na hruai khawh lengmang naak lai fak piin duhsaknak kan in ngeih! Miphun caah hruaitu tha si zungzal ko!
Hi capar tawi tein na ramchung saram phun vialte le tiva nung nga phun vialte kan temtuarnak, kan him lonak le kan dongh chin lengmang naak kong na sinah langhter kan rak duh. Hi capar in kan konglam kan rak langhtermi na hmuh cun kan caah fak piin khua na kan ruahpiaknak lai timi kan zumh. Hi capar in zaangfahnak hal le nawl zong kan in duh.
Kan caah na cawlcangh lo i rian na tuan colh lo ahcun na ramchung samram le tiva nung nga vialte hna cu ruahchannak kan ngei ti lo. Na ramchung tiva kip ah va kal law nga (fish) mui nan kan hmu ti lai lo; tlaangram ah va kal law saram nan hmu ti lai lo; cun zei tluk in dah thinghnah le ram kung nan kan suaksam timi na hmuh hna lai.
Tiva le tlaangram ah na kan hmuh hnga dingmi cu hi capar a rak tialmi te lawng kan tang cang. Kan mifim, mi thawng, mi lianngan vialte hna le kan i bochanmi vialte hna cu Boko Haram raltho kut in an ciam dih cang hna. A taangmi kanmah hna caah hmanh ah hin himnak an um ti lo. Bom in a kan phomh, dainamo (dynamo) in an kan phomnh, nga si in an kan phomh, si phunphun in an kan phomh i kan himnak ding lam a um ti lo.
Syria sivaidat tluk thawng lawng te hriamnam in phomh le den kan si tikah kan celh ti lo. Kan cikor rau lo ah a mit ko lai. Zeitik in dah Boko Haram raltho an rat lai i, hriamnam thawngthawng in an kan phomh lai i an kan den lai timi hi kan phang tuk. Kan lungretheih le thinphan hi a dam kho ti lo.
Kan khua le kan ram ah kan um ngam ti hna lo. Kan khua, kan inn le kan lo vialte a kan khanghpiak dih hna. Kan nule, kan pale, ka fale, kan chungkhar in kan ci an kan hmih dih cang hna. Zaangfahnak pelte hmanh an kan ngei lo. Hngakchia a si ti zong an kan ngei lo. Kan khua cia an ra i, bom a kan puah, dainamo in a kan thah. Kan cikor in hloh dih an kan timh cang.
Kan khua (tiva) kip ah rak kan zoh law nan kan hmu ti lai lo. Nan ka hmuhmi hmanh hi santlai lo tete lawng nan kan hmuh lai. Boko Haram raltho hi hi tluk in maw an rak sual ko na ti lai i, na khuaruah kan tam lai i, na zaang kan fak tuk ko lai tiah kan zumh. A hlanah cun Lairam tiva kip ah tlaih cawk lo le hmuh cawk loin kan rak tam i kan pungzam. Lai ram zong kan rak dawhter.
Sihmanhsehlaw Boko Haram raltho an thawh i an hran chin lengmang hnu cun a phunphun in an kan puanchuah i, nihin ahcun kan khua ah hmuh awk kan um ti lo. Kan inn chungah hmuh awk kan um ti lo. Kan inn le kan khua cu king dimdiam in an um cang. Tlor le mil tein kan rak tuah zungzalmi kha nihin ahcun lobuai le hramh hmun ah an cang cang.
Tlangram ah kal than law saram nan kan hmu ti lai lo. Na hmuhmi hna hmanh hi thinphan le lungrethei in a khatmi lawng nan kan hmuh cang lai. Kan ram le kan inn le lo cia ah kan hnangam ti lo. Kan fano zong Boko Haram raltho nih an kan kahpiak hna i, kan tar zong an kan kahpiak i kan mino le bochanmi zong an kan kahpiah dih hna. Kan nule naupawi zong an him hlei lo. Kan nule naupawi tiang in an kan kahpiak lengmangmi cu kan lungfak hringhran ko.
A tawinak in, tiva khuasa kan siah tlangram khuasa kan siah kan cikor in dongh kan tim cang. Lai ram a dawhtertu le a cawmtu dakaw kan si! Kanmah le kan inn le lo te ah khuasa le hmunkhur dawka kan si! Kan sualnak le kan palhnak zeidah an um i, hi tluk in thah le hloh le nawn nan kan timh. Kan khua le kan ram ah rak kan zoh u law zeitluk in dah kan temtuar i kan dongh cang.
Cucaah kan caah khua fak piin kan ruahpiak than ko tiah hi capar in khupbil bu le mitthli he kan in nawl ko. Kan ral mi thalo Boko Haram raltho kut in kan runveng cang ko sawh! Kan tiva ah himnak kan in hal; kan tiva ah zalonnak kan inn hal; kan tlaangram ah himnak kan in hal; kan tlaangram ah zalonnak kan in hal. Kan nule naupawi cu kan tonghpiak sawh ti hna hlah u! Kan fano tete kan tonghpiak ti hna hlah u! Lairam ah pangpar bang in kan parter than u law kan tiva kip le kan fing le tlang kip le nelrawn kip ah pungzam than ding in kan humhak hram ko.
Hi capar tawi tein kan himnak, kan thanchon le kan zalonnak kan in halmi hi fak piin na kan ruahpiak lai timi kan zumh. Boko Haram raltho tapung nih Africa ram Nigeria an pawnchuah hna i an khua, an miphun, an inn le an lo an suaksam hna i an hlohhrel hna i khuate tampi cu an um ti lo bantukin kanmah zong ramvai le tival kal kip nih pawnchuah in cikor hloh dih kan si lonak hnga rak kan humhak hram ko ti buin kan capar kan donghter.
Pathian nih thluachuahnak in pe seh!
Pathian nih na miphun le ram thluachuahnak pe seh!
Upatmi Chin State Chief Minister Salai Lian Luai
Hakha
Tuanvo Ngeitu:
Tlaangsam Saram Bu & Tiva Nga Bu
Meeting Hmun: Timit
A ni: April 20, 2017
Caan: 1:00 A.M