Mosul in thlanglei pengah ISIS le Iraq ralkap karlak ah fak ngaiin ningani ah kahnak a um. ISIS ralkap 50 an thah hna i, 32 an tlaih hna. ISIS nih khuate kip an rak lak i, an um hnawhmi cuh than lengmang an si cang.
Police lei upa nih ningani ah an chimmi cu ISIS umnak inn pali kan hrawh an ti. An chim thanmi cu a luan cia ni zeimawzat ah khan ISIS umnak khuate pawl zong kan chuh than len hna. Bom hmanhmi le inn kar le inn kar i kahnak nih harnak a kan pek ngai ve an ti.
Kan hnu thla October khan Iraq ralkap, an hawile ralkap le US le international an hawile raltuknak vanlawng nih biatak tein an vun phomh hna i, Mosul khua zong an lak dengmang cang. Atu cu a dum in an dum dih cang hna caah ISIS caah a har chin lengmang cang lai.
Syria leiin bawmhnak an hmu kho ti lai lo; zam an duh tik zongah an zam kho ti lo. Asinain mipi 270,000 hrawng a ummi hna hi ISIS nih an phaw ah an hman hna i, ahodah kan ral an si i, a hodah mipi an si timi theih a har ngai.
Iraq ralkap lei upa le US lei upa nih an chimmi cu Mosul lak ding in timhnak kan ngeih hnu in atu tiang ah ISIS 1500 leng kan thah cang hna a ti, asinain an tlaihmi kong cu an chim lo. Nizan ningani ah an tlaihmi 32 lawng an langhter. Ref: Iraq News.