2014 ah Quran nan thurhhnomh tiah sual an puh hna i, Muslim mibu nih Khrihfami nu-va pahnih cu thlakrawh rawhnak inn chungah mei in an rak khangh hna. Khrihfami zong fak tuk in an thin a rak hung. A khangtu hna cu biaceihnak nih a zawi hna i, an sualman cu hngawng hri thlainak nih a tlunh ve cang hna lai.
An rak khanghmi hna cu Khrihfami Shahzad Masih, 26 le nau a pawi liomi a nupi Shama 24 an si. Zeitik ah dah an thlai te hna lai timi cu an khiak rih lo.
Shahzad Masih le a nupi an thahnak ah hin Muslim a zaza in an i tel. Asinain minung 103 hrawng lawng an tlaih khawh hna i, minung 90 cu sualnak nan ngei lo tiah an thlah than hna. Cu chungah tlakrawh rawhnak inn a ngeimi Yousaf Gujjar zong aa tel. Cheukhat nih cun Yousaf Gujjar hi pei sual a puhtu hna cu a si cu an ti.
Minung pariat hi kum hnih thongthlak ding in biakhiahpiak an si. Minung panga thihdan an pekmi hna hi cu nu-va hna thahnak ah aa telmi an si. An hnuh hna, an tukvelhnak hna, zinaan an toih hna i mei in an khangh hna. Minung pariat zong cu bawmtu ah aa telmi an si ve tiah a thimi chungkhar lei sihni Riaz Anjum nih The Express Tribune ah a chim.
'Ka fanu le a pasal an thah lioah a hmu dihtu ka fanu upa bik nih cun a tlawm bik ah minung hleinga hi aa telmi an si an ti, asinain tu chun ah minung panga lawng sual an phawtmi cu ka lungtling lo tuk tiah Mukhtar Masih nih Bristish Pakistani Christian Association ah a chim.
A chim thanmi cu 'kum hnih thongthlak ding an timi hna hi a nem tuk. An sualnak le an dan hmuhmi aa tlak lo tuk' tiah a chim chih. A thimi chungkhar lei nih an chimmi cu 'sual phawtmi chungkhar leiin thihpheihnak an kan tuah. A sual man ah an inmi fate ruangah kanmah dangdang tiang in harnak a kan pek dih tiah Shama pa nih a chim. Ref: CP.