France khuapi, Paris ah bom a rak puah i minung a za in an thihnak ah aa telmi tapung tiah lunghrinhmi minung pali an tlaih hna. Algerian pahnih le Moroccan pahnih an si. A thlithup in EU ah ISIS a rak phurtu an si tiah zumh an si.
Nikhatni ah tapung dohtu ralkap nih Spain ah minung pali cu an tlaih hna. Muslim ram in ISIS an rak rat pi hna i Europe ram ah an rak luh pi hna. An inn ah an va tlaih hna. Turkey in Europe ah a rak lutmi refugee lakah aa telmi an si tiah an zumh hna.
2015 ah Paris an rak puah i minung 130 an thihnak ah khan aa telmi an si ti zong an zumh hna. Galicia ah minung pahnih an tlaihmi hna hi Algerian an si i, Almeria ah an tlaihmi hna pahnih hi Moroccan an si. An hlathlai cuahmah lio hna a si.
Officer nih an zumhmi cu atu an tlaihmi hna le Paris a rak puahtu hna kha a pehtlaimi an si ko tiah an zumh. Australia ah ISIS an tlaihmi he zong in pehtlaihnak a ngeimi a si ko tiah an zumh. Austalia ah an rak tlaihmi cu Pakistan pa Mohamad Usman he France ah an rak kuat hna.
Bia an hal hna tikah 'France ah kal i bompuah ding in timhnak kan ngei ko' tiah an rak phuan. Usman hi bom sertu a si i, Pakistan i tapung bu pakhat Lashkar-e-Teiba caah bom a rak sermi a si.
Spain cozah zong ralrinnak biatak tein an vun la cang. 2015 in khan tapung dohnak in biatak in runvennak an vun la. Lunghrinhmi 168 an tlaih cang hna. Tapung kan dohmi nih mipi himnak tampi an kan pek ko nain thinphan awk um lo taktak tiang cun kan tuah kho lai lo tiah ralrinnak a chim. Ref: The Sun.