Boko Haram tapung hmurkhurnak Nigeria ram cu lungrethei in an umnak caan a sau cang. Rawl-ei awk ngei loin hngakchia a thongthong in a thi ding an tam tuk tiah UN nih ralrinnak a chim. Nigeria, Chad, Niger le Cameroon ah dong loin raltuknak a um.
Million pahnih leng zohkhanh an si cang i, tapung hrenmi khua tam tuk an um rih hna. The Guardian news report nih a chimmi cu 'thlaam sakmi camp ah hin a ruh lawng a tang cangmi hngakchia tampi an um. An der ning le an ruh lawng a tan ning hi chim awk tha loin zaangfak an si' tiah a chim.
Mah tluk dirhmun ah an um ko nain zohkhanhmi a tha leiah a ummi an si tiah a chim rih. UN leiin biachimtu pakhat Orla Fagan nih a chimmi cu 'hi hna hi nan bawmh hna lo ahcun hmai kum in cun 120,000 mi thi ruak na hmuh ko lai hih. Hngakchia deuh lawng te an si' a ti.
Rawl tha deuh le a herh ning in kan bawmh khawh hna lo ahcun thihnak lawng te a um lai' tiah a chimh. Hngakchia 400,000 hrawng hi eidin lei chambau ruangah a zual hma ngaiin an um tiah Save The Children i hruaitu Kevin Watkins nih a chim.
A rannak in kan bawmh colh hna lo ahcun ni khat ah minung 200 hi hmai kum tiang ah an thi lai. A rannak in khuakhan le riantuan kan hau ko tiah a chim chih. UN riantuantu upa lei nih khuate tam pi an phanh khawh lomi le an theih khawhmi lomi an um len hna. Nigeria state i uktu Kashim Shettima nih a chimmi cu 'lo kan tuah khawh lonak hi kum li chung a si cang' tiah the guardian sinah a chim.
Boko Haram tapung nih zeihmanh tuah kho loin an kan tuah. Mah ruangah hin 55,000 hrawng hi cu mangtam nih a kan den tiah Shettima nih a chim. Tapung nih hin refugee zong tam tuk an chuahter i, zohkhanhnak camp tbk zong ah a thongthong in an umter hna i, ei awk ngei loin minung a thongthon an thihter hna.
Hauma Nana 35 nih 'fa panga ka ngei i, pakhat cu rawltam in a thi cang i, atu zong a hniang cem hi thih bawh in a um cang. Nikhat ah voikhat lawng rawltam phal in ka pek khawh hna' a ti. Ref: The Guardians.