President a vun tlin cangka caan zeimawzat a vun rauh cun vawleicung hruaitu hna nih conglawmhnak bia an rak chim cio. Cheukhat cu phone in a chimmi zong an um hna, cu chungah Taluk Prerident Xi aa tel. Israel Prime Minister Benjamin Netanyahu zong aa tel.
Asinain 'a hmasa bik caan tha' ah tiah Inn Raang pi ah na ka tlawng lai tiah President Trump nih Netanyahu cu a sawm. Trump lungthin ah Israel hi a rak um hrimhirm ko hnga maw ti ruah phu a si. Vice President Mike Pence nih cun 'Trump le keimah kan tlin ahcun Israel kan dirpi ko timi hi vawlei pi a theih lai' tiah fak taktak in a chim.
Trump le Netanyahu hi an i theihnak caan a sau cang. Phone an i chonh cu an i nuam i an biaruah a thaw tuk tiah biachimtu nih a chim. 'A voikhatnak caan tha kan pek, US ah kan i tong lai' tiah a chimh. Netanyahu nih a lehmi cu 'ka nupi Sara le keimah tiin kan rak tlawng lai i, President Trump le a nupi Melania hmuh lai kan i ngaih tuk' a ti.
President a vun tlin ni ah Netanyahu nih conglawmhnak a chimmi cu 'Republican hi Israel kan hawi tha tuk a si' tiah a chim. Tuan deuh i Iran nuclear kong an rak buai tuk lio zong ah khan President Obama nawl loin Congress nih an rak sawm i Netanyahu nih Iran kong fak ngaiin Congress ah a chim. Republican nih Israel an dawtnak hi a lang peng.