President Obama nupi First Lady Michelle Obama cu facebook ah zawng tiah an auh ruangah miphun thleidannak bia a si tiah fak ngaiin media kip linhsatnak a chuah pi.
Pamela Ramsey Tahlor nih First Lady cu zawng (ape) tiah a auh. A peh thanmi cu Inn Raang pi ah zawng hmuh nih a ka simh tuk cang. Inn Raang pi ah a tungtai a thami, aa dawhmi le iang a ngeimi First Lady (Melania Trump) hmuh lai kan i ngeih tuk' tiah a tial.
Local khuabawi Beverly Whaling nih soiselnak dang a chap chih. An khua hi West Virginia i Clay County ah a si i, 2010 tiang i milu relnak ahcun African-American an um lo. Minung 9,000 chungah 98% hi vunrang an si.
Khua fate an si nain Michelle Obama an soiselmi thawngpang cu US rampi cul lawng si loin vawleicung ram theih in a thang dih manh. Michelle Obama a soiseltu hna cu dantat si hna seh tiah min a thu cangmi hna hi 85,000 leng an si cang.
Washington Post le New York Daily nih an chim ning ah cun Taylor cu a rian in phuah a si cang an ti. Taylor nih a chimmi cu 'facebook ah kan postmi hi nisawhnak le miphun thleidannak a si hrimhrim lo. Melania Trump duh a nunnak ka chim sawhsawhmi a si ko' a ti.
West Virginia Democratic Party Chairwoman Belinda Biafore nih a khuami Mountaineers aiawh in Michelle Obama cu ngaihthiam a hal. 'West Virginia hi mah naak in a let in a tha deuhmi kan si. Huatnak le thleidannak hi West Virginia nih kan doh cuahmahmi zong a si' tiah a chim chih.
West Virginia 68.7% nih Donald Trump an vote.