Nu tung hrial lo, ngaknu hrial lo, hngakchia hrial loin ISIS nih an tlaih hna i an duhmi an lak hna i an duh lomi hna kha a bubu in market ah an zuar hna. Minung pakhat hnu pakhat hnu sinah zuar an tong i an caah vawlei hi muihnak in a rak khat. Cuticun tampi cu misual hna kut in an nunnak an liam thai hna i, cheukhat cu sal ah a tang thai hna.
ISIS kut ah a ummi an unau hna phuhlam ding le sal ah a um rihmi hna tlanh awk ah Kurdish ngaknu hna cu meithal he ISIS doh awk ral an tho hna. Yazidi nu hna hi ISIS kut ah tam ngai an um rih. A tlawm leiah 3,000 hrawng cu an um lai tiah zumh a si. Sal bantukin an hman hna i tlaihhrem, hrem le tukvelh hi ni fatin in an tuar.
Kurdish ARA News nih nirukni ah a chim ning ahcun a taangmi kan hawile khamh awk le phuhlam awk ah ISIS kan doh cang hna lai an ti tiah a chim. Kurdish ngaknu nih an chimmi cu 'an nun bu in an khanghmi kan hawile hna kan in philh rih hna lo; market ah sal ah an zuarmi kan in philh hna lo' tiah an hruaitu ARA News ah a chim.
Kan theihmi cu 'ISIS nih an tlaihmi kan hawile nih a kan khamh hrimhrim lai timi ruahchannak an ngei peng rih. An phu kan hlam dih hlan tiang le kan luatter dih hna hlan tiang kan dai lai lo' tiah a chim chih.
2014 in ISIS nih Iraq khua an vun lak thluahmah hna ah khan, tar deuh le pa deuh paoh cu an thah hna i nu le ngaknu paoh cu nupi, sal le zuar awk caah an lak dih hna.
ISIS nih an zumhmi cu nu nih a kan thah ahcun vancung ah ngaknu virgin 72 kan sung lai ti hi a si. Nu kut hrimhrim in thih hi hell tlaknak a si tiah an zumh i pa nak hmanh in kanmah hi a kan tih deuh tiah raltho nu Tekoshin nih AFP news ah a chim.