Syria ramchung buainak le kahdohnak ah Russia le Iran an i tel. Naite kha dohtu party raltho hna dornak Aleppo cu an lak cang. Mipi tam tuk an thah hna pinah nu tlaihhremnak a tam tuk. President Obama nih ningani ah 'sualnak ngei lo mipi thisen nan kut cungah aa nalh' tiah a vun a ti hna.
Aleppo khua cungah Russia le Iran le Syrian cozah nih nan tuahsernak nih kan khuaruah a kan harter. Hi sualnak le thisen chuahmi vialte hi nanmah nan si. United States nih cun kan si khawh chung in ral kan kham, asinain mipi cungah dong loin sualnak nan tuah chih peng tiah a chim.
A chim thanmi cu 'vawleicung kip ah hi bantuk thil thalo tuahnak tam pi an um. US President ka si bantukin keimah tuanvo a si. Ka office ruangah ka tuanvo an si. Nunnak khamh awk ah zeital ka tuah khawhmi a um lai maw, sualnak a ngei lomi hngakchia hna tuarnak in ka khamh kho hna lai maw? An caah thil sining ka thleng kho lai maw a ti.
January 20 in cun Inn Raang pi a chuah tak cang lai. Trump zong nih Aleppo khuami a bawmh hna i, him tein mipi an luatternak ding in aa zuam a hau timi a chim. Syria President Assad hi biatak tein dohtu ralthok he 2011 in ral a thomi a si. Tongta thah in mipi thahnak in a president sinak hi a humhak peng awk a si lo' iah President Obama nih a chim chih.
US nih a si khawh chung in raltho party le Syrian cozah karlak ah kahdaihnak ser ding aa zuam. Russia zong tlangtlak ding in an fial lengmang. Asinain zei hmanh ah an relpiak ti hna lo. Kahdaihnak an sermi zong an hrawh colh than i an i kap than. Syrian cozah lei nih kan tei cang hna timi an theih cang tikah zeihmanh ah an relpiak ti hna lo. United States santlaih lo ngai a si.
UN leiin UN Secretary General Ban Ki-moon nih Syria cu hell bantuk a si cang. Mipi luatnak ding in party kip nih a herh ning in tuanvo an lak i, him tein mipi kan luatter hna ding an si' tiah a ti. John Kerry a siah Samantha Power a siah mipi that lo ding in ralrinnak an pek ve hna. 2011 in atu tiang ah 310,000 leng an thi cang. Ref: TOI.