Campaign a tuah lio tein President thimmi Donald Trump nih a chim tawnmi cu Jew miphun zungzal khualipi Jerusalem, Jew mi khua thiang ah American Ambassy kan tial lai a rak ti. Trump bawmtu nih naite ah an vun phuan thanmi cu Jerusalem ah US Ambassy thial ding in Trump nih a timh taktak ko tiah an chim.
Israel kongah Trump ruahnak petu zong a si i, Trump hawi tha ngai zong a simi David Friedman hi Israel i US ambassador caah kan thlah lai tiah President thimmi Donald Trump nih a phuan cang. Friedman zong nih Israel zungzal khualipi Jerusalem ah rian ka tuan lai a ti ve. Zeitik ah dah an thial lai timi ni le caan an chim rih lo.
'Israel le America pehtlaihnak hi thuk piin hram a tla cangmi a si. President ka tlin ahcun Israel le America karlak ah nitlak a um ti lai lo' tiah Trump nih mi thongthong hmaiah a rak chim. Israel ah ka thlahmi Friedman nih a tha tukmi Israel le America pehtlaihgnak a tawlrel lai tiah President thimmi Trump nih a chim.
Israel ah America aiawh ding in Trump nih a kan thimmi cu upattlak ngaimi thil le toi a doiter ngaimi thil a si. Kan ram pahnih thawnnak le thanchonnak caah kaa zuam lai. Pawngkam ram hna he daihnak ser kan zuam lai. Israel mi hna zungzal khualipi Jerusalem in kan tuan lai tiah fiang ko in Friedman nih a chim nolh.
Israel cu 1948 ah State sinak pek an si cang i, atu hi Palestinine zong state sinak an hal lengmang. An buainak a dong kho ding a si ti lo caah chuekhat nih cun state pek zong a tha ko a timi an um cang. Asinain Israel le US nih cun an duh bal lo. Friedman nih zong nih a chimmi cu 'state pek lawng hi lam a ummi a si lo. Trump nih lam dangdang a ngei ko' a ti. Ref: TOI.