US nih ISIS hruaitu Abu Bakr al-Baghdadi a that khomi caah tangka a thapmi $ 25 million tiang a vun kaiter cang. Abu Bakr al-Baghdadi a umnak a thei i, kan tlaih khawh tiang a kan chim khomi paoh cu US dollar million 25 kan in pek hna lai tiah an vun thanh than.
Tuan deuh ah khan $ 10 million an rak ti nain atu tiang ah an hlawhtling lo tinak a si. Asinain $25 million ah an kaiter than. A tam kho tuk cang. Syria le Iraq ah ISIS state kan ser lai tiah a aupitu a si. Mipi an thah ning nih vawleicung khauruahhar in a chiah hna.
US nih $ 10 million an vun thap ah khan Abu Bakr al-Baghdadi nih fak deuh in rian a vun tuan chin lengmang ve. Abu Bakr al-Baghdadi hruaitunak tangah zeitluk in dah Syria le Iraq ah mipi an tuar i an thih timi cu kan theih dih. Vawleicung tiang in ah minung a zaza in an thah hna.
Lungrethei le thinphan in mipi an chiah peng hna. US State Department nih cun kan No. 1 ral a si an ti. A umnak hi a theih in an thei kho ve lo. A caancaan ah video in bia a vun chim lengmang tawn. 2015 ah khan Iraq ralkap nih an chimmi cu Abu Bakr al-Baghdadi aa citmi motor kan raltuknak vanlawng in kan kah an ti i, fak ngaiin hma a ing ti zong an rak chim.
Asinain US nih cun a hmaan taktak hnga maw tiah an zum thlu lo. Asinain atu tiang in a nung ko timi an theih tikah US nih a let in tangka a thapmi zong a vun kaiter than. Ref.CNN.