Sianghngakchia le cachimtu sayamah duh ti hi a um lengmang. Laimi zong kan hmang ve nain dantatnak pek tiang cu kan tong bal lo, asinain US tbk hna ahcun fak tuk in sayamah cungah hma an lak tawnmi kan hmuh. A tanglei zong rel law zei tiang dah hma an lakpiak timi a um lai.
Mary Beth Haglin, 24 sayamah nu cu a sianghngakchia kum 17 pa he ni fatin in thla ruk chung an um ti. An um ti lo caan paoh ah selfie hmaan an i thlakmi zoh awk ah a kuat lengmang fawn. Message an ka kuat lengmang i a hnu ahcun hi tiang dirhmun hi kan phanhnak a si a ti.
Sayamah pakhat nih hi bantuk thil tuah cu a phung si lo timi ka theih ko. Message an ka kuatmi zong kaa theihter lo. Sianginn ah cun hi bantuk thil tuah cu a phung si lo caah tei khawh kaa zuam tiah biaceihnak ah a chim. Asinain a hnuah cun minung pakhat nih a ka kuatmi ka leh ve tiah a chim.
Pehtlaihnak kan ngei i, October 2015 ah pumsa pehtlaihnak kan tuah a ti. Ni fatin in kan tuah. A motor ah a si, ka motor ah a si, a nu inn ah a si, a pa inn ah a si. Caan a vun kal deuh tikah donghter kaa zuam, asinain a ka sian ti lo caah ka phuan dih lai tiah a ka thihpheih cang tiah Haglin nih biaceihnak hmaiah a phuan dih.
'Kan luan tuk cang tikah kal tak kaa zuam. Asinain meilah ka van lai i, kan khangh lai tiah a ka hro lengmang ruang ah kan i pehtlaihnak donghter ka ngamh ti lo' a ti. A hnuah hmun khat an um ti lio sianghngakchia pakhat nih a hmuh hna i, cu hnu cun an konglam lengah a chuak i, an i pehtlaihnak zong a dong beh.
February 17 ah a bia khiahpiak a si lai i, $6,250 maw an liamter te lai; kum hnih thong dek an thlak te lai. Sex leiah sualnak tuahtu ka si tiah kum hra chung register a tuah hau fawn lai. Biaceihtu Heidi Carmer le Monica Slaughter nih cun atu tiang kan ceihmi ah cun kan lungtling ngai ko tiah an biaceihnak zung an chuah pah in an chim. Ref: The sun.