Iraq Federal Police ralkap nih nithumni ah Mosul ah ISIS 26 an thah hna tiah Defence Ministry lei media nih a report. Sang pakhat ah ISIS nih miakpi an rak kah hna i khuami minung pali maw an thih lai an i hliam lai dah tiah a chim chih.
ISIS hmunkhuar pakhat a simi Tal-al Romman khua ah Iraq federal police ralkap nih biatak tein an kah ciammam hna i, ISIS raltuknak tank pahnih zong an hrawhpiak chih hna. Mosul ah a si than i, ISIS nih miakpi in an kahnak hna ah khuami pakhat a thi i, pathum an i hliam.
Nithumni ah Mosul pawng um khuate pathum zong an lak cang. Mosul in nichuah lei sang 50% cu kan lak dih cang tiah ralkap lei upa nih a chim. An zate in khua 50 kan lak cang an ti. Nikhatni ah a thli in Samarra sang ah ISIS luh an i tim i, Iraq ralkap nih an thah hna.
Cu chungah minung pahnih cu nunnak thak in bompuah aa timmi an si tiah media nih a report. ISIS hmunkhuar a simi Tal Afar khua ah fak tuk in ruah a sur i, ISIS nih bom an chiahmi lila pahra nih a puah hna i minung 32 leng an thi tiah media lei nih an report. ISIS uknak Tal Abta zong kan dum dih cang.
Nilini a si lo cun ningani ahcun kan lak cang lai tiah Al-Hashed al-Shaabi raltho bu biachimtu Ahmed al assadi nih a chim. Ref: Iraq News.