President thimmi Donald Trump nih Iran nuclear hnatlaknak an tuahmi hi kan hrawh than lai a timi cu Taluk leiin an vun leh ve. Iran nuclear kongah hnatlaknak kan tuah cangmi ramchung thil thlennak menmen nih a hnursuan awk a si lo tiah foreign minister Wang Yi a ti.
July 2015 ah khan Vienna ah minthutnak an rak tuah i, January 2016 ah cun a nung cang. President a term hnihnak a tuan ah Obama nih a biapi tukmi hlawhtlinnak a chuah pimi a si. Hnatlaknak an tuahmi ah cun Iran nuclear ser an ngolter i, US le ramdang nih dantatnak an khinhmi an lakpiak than.
Trump nih cun office ka kai in an hantlaknak sermi hi ka thleh colh lai a ti. 'Hnatlaknak tuahmi vialte lakah a chia bik a si' a ti. Asinain Wang Yi nih cun 'hnatlaknak kan tuahmi hi hmun khat ah kan tuahmi a si i, tuanvo kan ngei dih. Kan ramchung thil sining thlennak men nih a hnursuan awk a si lo a ti.
A chim duhmi cu President Obama chan ah tuahmi a si i, President thimmi Donald Trump nih a thlen ding a si cang caah Trump zong nih hnathlaknak hi biapi lo ah a ruah awk a si lo a ti. Naite ah US Congress nih Iran dantatnak an khinhmi a dih cang dingmi cu tharchuah than ding in an vote.
Iran nih President Obama cu na kham lai tiah an hal, asinain zeihmanh a um rih lo. Kum hra chap than ding timi hi Iran nuclear konghe aa pehtlaimi a si lo. Iran cozah nih human rights a buarmi le missiles a hneksakmi ruangah an si. Iran le Taluk pehtlaihnak hi a tha chin lengmang.
January ah khan President Xi Jinping zong Iran ah a tlawng i, economic pehtlaihnak hnatlaknak an tuah. A ra laimi kum hra chungah $600 billion tluk miak ding pehtlaihnak an tuah. Vawleicung ah economic nganbik pahnihnak ah aa telmi Taluk a si. Zinaan le gas a lak biknak ram cu Middle East in a si. Ref: TOI.