India Iron Lady tiah an auh i, India politician minthang ngai a simi J Jayalalitha cu zarhpini zan ah lungtur in Chennai Apollo Sizung ah a thi. J Jayalalitha hi thil ti kho taktak i, zei poah ah aa tel khomi nu a si tiah an upat i, an uar ngaimi cu pakhat a si ve.
A thih thawng an theih cun a thongthong in a hramtu le a tuar pitu cu an rak chuak hna. Minung an tam tuk tikah police nih runven hau in an um hna. A pum cu Indian aalaan in an tuam i, mipi hmuh khawhnak hall ah an chiah.
Nihnihni, a thih ni hi kan upatnak langhternak caah National Holiday a si lai tiah Delhi i Cenral Cozah an thanh. Tamil Nadu ah cun ni sarih chung a zunngaihnak kan ngei lai an ti. Prime Minister Narendra Modi zong Chennai ah ruakhumh ah a kal lai.
Tamil Nadu ah voili tiang bak te Chief Mnister a tuahmi zong a si i, voizakhat leng tiang film ah a langmi a si. Politics he film industry he a minthangmi Indian nih an ngeihmi nu saltha taktak a si.
An thangthatnak le an upatnak kip an langhter. Twitter, facebook le social media kip ah J Jayalalitha kong le tuarpinak lawng te a khat. Congress party biachimtu Khushboo Sundar nih a chimmi cu 'politics ah kan i dang ko hna nain ka upat taktakmi nu a si. A kan kal tak ding cu kan siang hrimhrim lo' a ti.
'Nu covo au pitu nu saltha kan sung' tiah a chim chih.
Asinain voi tam ngai te ziknawhnak a tuahmi a si tiah thong zong ah a tla. A donghnak a thongtlak cu 2014 ah a si. 2015 ah High Court nih an dantatnak an donghter i, politics ah a lut than. A umnak State Tamil Nadu hi India economic ah a thawng bik pakhat ah a ser khotu pakhat zong a si. Ref: BBC.