Africa ram Ghana ah mi hrokhrol bu nih chan pi chan khat deng bak ah US Embassay deu an dirh i, $6,000 (£4,700) in US khualtlawnnak visa an zuar. Zeitin dah caan sau pi chung an tuah khawh ning a si hnga timi nih vawleicung an khuaruah a harter tuk hna.
US State Department nih an chimmi cu 'Ghanaian le Turkish mi hrokhrol bu nih a deumi US Emabssy an ser i, US aalaan le President Obama hmanthlak hna tar in caan sau pi chung dawnhkhanhnak um loin US visa an zuar' tiah a ti.
US khualtlawnnak visa a cawmi hna zong hi Emassy ah a kal balmi si dawh an si lo; embassy umtu ning zong a thei balmi si dawh an si lo tiah journalist Sammy Darko nih a chim. 'Mirang zong an um ve tikah US embassy taktak ah an ruah cio ko hna' tiah a chim chih.
A riantuan ning cu, an embassy ah visa cawtu hna kha ratter loin anmah tu kha khua kip ah kal in minung an va lak hna. Cuticun hotel le hmun dangdang ah an tlunter hna i, an visa deuh cu an tuahpiak hna. State Department nih an chimmi cu 'ziknawh hmang Ghana officer he bawm in an tuahmi a si' a ti.
An khuaruahhar than ngaimi cu media zong nih cu hlan in an rak theih bal hna lo timi hi a si. December 2 ceo lawng in an vun theihmi a si. An visa sermi hi a hmaanmi he a deumi he aa tel ko. US ah hi visa in a phan cangmi hna hi kan thei kho ti hna lai lo tiah US state Department nih an chim than.
Mi hrokhrol bu ah aa tel ko tiah ruahmi minung zeimawzat an tlaih cang hna. A dangdang zong an hlathlai cuahmah lio hna a si. Ref: BBC.