2011 in Syria ramchung kahdohnak a chuak. Russia nih Syrian president Bashar al-Assad an dirpi i, US le an hawile nih dohtuparty hrimtlai a dirhkamh ve hna. Atu tiang in Russia nih veto power voisarih a hman cang i, Taluk nih voiruk a hman cang.
Tutan zong ni sarih chung kahdaihnak kan ser lai tiah UN ah an ceih i, Russia le Taluk nih an veto than. Ni 7 chung kahdaihnak ser ding in biatung a chuah pimi hi Egypt, New Zealand le Spain an si. An biatung ah cun kahdaihnak kan ser lai i, ni 7 chungah Aleppo khua ah a ummi bawmhchanhnak um seh an ti.
Raltuknak nih a hrenmi hna hi 100,000 leng an si. Rawl kong, ti kong le si kong tbk ah khuaci mui in an um cang hna. Sizung tbk zong an ngei ti lo. Inn rawk lawng tein an khat cang. Kahdaihnak kan ser chung ah kan bawmh hna lai timi ruahchannak he biatung an chuahmi a si, asinain veto in an kham caah an lungrawk ko.
French envoy Francois Delattre nih cun 'mipi an thih le thih lo tuak loin Russia nih Aleppo lak a duh caah a si' a ti. 'Veto in Russia le a hawile nih nan khammi nih hin Aleppo khuami nu le hngakchia hna a thongthon in ralsa ah nan terh hna' a si tiah UK leiin Matthew Rycroft nih a ti ve.
September 2015 khan Russia le Syrian raltuknak vanlawng nih Aleppo cu fak taktak in an phomh cang. Aleppo hi Syrian khuapi lian bik a si. An chawlehthalnak le a dangdang ah a biapi cemmi a si. Atu cu Russia le Syria ralkap nih 70% cu an lak cang tiah theih a si. Ref: BBC.