'Ralkap an ra i, an kan tlaih cang lai. Dear vawlei pi, ni dang ah kan i hmu than te hna lai' tiah a donghnak twitter in ca a thlah hnu cun ral ram ah a ummi Aleppo khua mi Bana Alabed kum 7 Syrian nute thawngpang an thei ti lo.
Bana hi ral ram Aleppo khua ah a ummi a si. Twitter in an tonmi harsatnak le raltuknak kong a rak tial tawnmi nih vawleicung pi hna a tunter. Asinain nirukni in cun a hman tawnmi twitter account a um ti lo, zeidah a ruang si timi an hngal lo.
Twitter zultu 100,000 leng a ngeimi a si i, Syrian raltuknak kong a rak ruah tawn hna. November 27 ah a rak tialmi cu 'tuzan cu inn kan ngei ti lo, bom nih a hrawh cang. A cim dih cangmi lung kekkuai lawng an um cang. A thimi zong ka hmuh hna i, keimah zong ka thi dengmang' a ti.
A rak tial thanmi cu 'bompuahnak lawng te a si. Thihnak le nunnak ah kan um, zaangfahnak tein thla kan rak kan campiak ve u' ti. Zarhpini tiang ah khan cun a twitter account a nung rih. September ah khan a nu nih a rak siampiakmi account a si. A caan ahcun bom an rak puah lio video le thawngpang zong a rak hrawmh tawn hna.
Nikhatni ah thla a campiaktu nih a tialmi cu 'Bana le a chungkhar, Allah nih him tein in an veng ko hna seh. Zaangfahnak tein nan him le him lo kan theihter te u' tiah Lil Yum Yum nih a tial.
'Bana le a chungkhar Pathian nih an um pi ko hna seh. Nan himnak ding ah thla kan in campiak hna. Hmun dang ah nuam tein umnak caan tha ngei kho hram u' tiah Dan Jones nih a tial.
Nirukni tiang ah khan cun Syrian cozah lei ralap nih Aleppo in nichuah lei kap 20% cu an lak dih cang. Ref: CNN.