A pum vialte cu mei nih a kangh dih cikcek cang. A celh ti lo. A nu nih lungthin kekkuai in a tang cungah cun aa pom i, a mitthli cu dong loin a biang cung cun an luang thluahmah. A fanu te nih cun din tein ka nu, 'ngaithiam ko hna' a ti.
IRaq, Mosul khua inn pakhat ah ISIS an lut i, nu-fa hna an rak um. A fanu kum 12, te cu aa kholh cuahmah lio a si. Khrihfami, Shia le Alawite Muslim sinah ISIS nih ngunkhuai an kholh tawn bantukin an rak kholh hna. A nu nih cun ka fanu aa kholh lio i, cikhat te ka hngak ko rih u tiah a nawl hna.
Asinain ISIS nih second tlawmpal te zong kan in hngak kho lo an ti i, a fanu te aa kholhnak khaan cu ISIS nih mei in an khangh. A fanu te aa kholhnak khaan vialte zong a kangh dih i, an inn tiang in a kangh dih, a fanu te an khamh khawh ah khin cun a mei hma a fak tuk cang.
Sizung ah an kal pi. A mei hma a fah tuk cang caah a celh ti lo i, a nu nih a mitthli he aa pom i, tah lawng te a rian. Zei ti hmanh in a tuah kho hlei ti lo. A zoh cuahmah lio ah cun a fanu nunnak thazaang zong a ziam thliahmah lei a panh. A fanu a cah lai teah a nu a cah takmi cu 'ka nu, rak ngaithiam ko hna' a ti.
A chim thanmi cu 'muihnak lak zong ah ceunak a um ko, ka nu. Ceunak a umnak poah cun ruahchannak zong a um ko' tiah a chim khawh cun a cat colh. Cuticun a fanu kum 12 te nunnak cu a dong.
ISIS nih an thahmi Khrihfami tuanbia kan theihmi lakah aa dawh tukmi zumhnak le nunnak a langhtertu Khrihfa zumtu fanu tha taktak a si. Ref: The Tellegraph.