Kachin, Shan le Rakhine ram tbk hna ah Tlang Cung hriamtlai bu le cozah ralkap kahdohnak a um chin lengmang. Kawl ralkap nih KIA sakhan an lak a thaizing ah mipi a thongthong nih lam zawh in Kawl ralkap kan in dirpi ko hna tiah an rak tanh pinak an rak langhter.
Ralkap tanpitu ah aa telmi hna cu phungki, ralkap lei riantuantu hna, ram dawtu tiah aa ruatmi hna, tlangcung miphun zong an i tel i, mipi zong an i tel. Cheukhat nih cun ram aalaan an i put i cheukhat nih ralkap aalaan an i put.
Ralkap hi kan ram nunnak le kan biaknak caah a herh tukmi an si. Ralkap a thawn lawng kan ram a thawng lai' tiah secretary of the Myanmar National Monk Union (Yangon) phungki U Thu Sateta nih a chim. Ralkap tanpinak langhter duh ah lamhla pi tiang in a rak i telmi zong an um. Kayin State Maywady ah a ummi phungki U Pyinnya Thiri nih a rak tel pi hna.
'Raltho hna umnak hmun ah khua a sami ka si i, an sining ka theih dih. Cucaah cun ralkap an biapitnak hi ka theih chin lengmang' a ti. 'Kuanfang' tiah an auhmi U Hla Swe zong mipi hmaiah bia a chim. A chimmi cu 'Tlang Cung hriamtlai bu doh ding in ralkap ka forh ve hna a ti.
KIA, Ta’ang National Liberation Army, Arakan Army le Myanmar National Democratic Alliance Army fonh in a dirmi Northern Alliance le Kawl ralkap karlak ah kahdohnak a fak chin lengmang.
Hla Swe nih a chim thanmi cu 'cozah tlaitu a hodah an si kha biapi a si lo, hi hriamtlai bu hi a zungzal in dohdeltu an si. Kawl ralkap nih an dohmi hna cu ka dirkamh tuk hna' tiah a chim than. "Naite ah tapung bu tiah kan auh hna lai tiin parliament ah an ceihmi kha ka hnatlak pi hna' tiah a chim chih.
Daw Khin Wine Kyi nih mipi sinah a chim thanmi cu 'kan ralkap hi ram caah a nunnak aa pemi an si. Kan ram himnak caah ral a domi an si. Zei cozah dah nawl an ngei ti kha biapi a si lo. Kan harnak chung in a kan vengtu cu ralkap an si. Kan ram caah ralkap cu an herh tuk' tiah a chim. Ref" Myanmar Times.