Dunya taksa le hmai cu a daang dih i, a thabat zong a celh ti lo. ISIS nih an kan hmuh sual lai tiah a thli tein mui lak in a fale pathum he an zam. 'Pathian runvennak thawng in him tein ISIS chekpoint pahnih kan hrial khawh' tiah CNN ah a chim.
ISIS chekpoint kan hria lioah ISIS an kan hmuh i, 'dir u' 'dir u' tiah an kan au hnawh. Asinain kan kal chih i, an kan kah. Kan zam chih i, ISIS hmuh lonak tiang kan phan tiah a chim. Cuticun tluang tein Mosul in nichuah leiah refugee camp ah an rak phan kho.
ISIS nih chekpoint an congh dih ko nain a thli tein a zaam khomi hna hi 600 hrawng an si i, cu chungah Dunya le a fale pathum an i tel. Refugee camp an rak phak ahcun tuan deuh ah a rak phan cangmi chungkhar nih vanram hlah maw a si ti tluk in lunglawm taktak in an rak don hna.
An mitthl i an tap pah thluahmah hna. 'Pathian nih ISIS cungah lehrulnak tlunter ko seh' tiah an chungkhar pakhat nih Dunya fale pakhat hnu pakhat in a hnamh pah hna in a chim. Ruah a sur tuk i, vawlei zong a cet pinah hngakchia cu an tem tuk. Zaangfak tuk a si ko tiah CNN nih a chim.
Refugee camp hi Mosul in nichuahlei ah an um i, Mosul in a rak zammi hna dornak a si. Camp ah refugee dirhmun in harsa taktak in an um ko hna nain ISIS lakah um naak cun a nuam deuh tuk i, kan hna zong a ngam tuk an ti. Kan chungkhar him le ka fale himnak kha biapi deuh a si tiah nu pakhat nih a chim. Ref: CNN.