December 19 ah Elector pawl vote an thla cang lai. Atu lio hi biachokvai a um lengmang. Trump cu kan vote lai lo ti zong a um. Ohio Governor John Kasich kan vote lai ti hna a um tikah Kasich nih US President si ding in Trump hmun ka la lai lo tiah a tanglei bantukin fianternak a vun tuah.
Nihnihni ah Ohio Gov. John Kasich nih Elecotral College chung i elector pawl cu 'December 19 nan i ton tikah keimah cu ka vote hlah u tiah twitter in a tanglei bantukin a tial:
'President caah aa cuhmi ka si lo. Vote nan thlak tikah keimah cu ka vote hlah u. Kan ram nih thimnak kan tuah i Donald Trump nih a tei cang. Kan ram hi aa then tuk cang. Kap hnih in lungthin a dam rih lo. Atu bantukin keimah nan ka vote than ahcun kan ram aa then ning a zual chin lengmang lai' a ti.
A chim thanmi cu 'rualremnak kan herh tuk lio a si. Thimnak cu a dih cang. Atu cu hmun khat ah kan rat than caan a si cang' a ti. Nikhatni ah Texas elector (vote thlatu ding) Christopher Suprun nih New York Times ah a tialmi cu 'Trump ka vote lai lo' tiah fiang ko in a ti. A chim thanmi cu John Kasich nih a kan hruai ahcun kan ram caah lungrual thannak caan tha kan ngei' a ti.
December 19 ah Suprun telh chih in elector 538 nih vote an thlak lai. John Kasich hi vote ding in timhnak a um pah tikah Kasich nih 'Trump hmun lak ding in timhnak pakhat hmanh ka ngei lo' tiah a chim ve. 'Atu cu thimnak a dih cang. American kan si bantukin hmun khat ah kan i pumh than caan a si cnag' tiah a chim chih. Ref: CNN.