Democratic National Committee e-mail cu Russia nih an hack hna tiah theih a rak si. Nizan ningani ah President Obama nih kum dongh conference ah 'Russia President Putin sinah ka chimh i, atu kan chimh hnu thok cun computer hack hi ngol cang u' tiah September ah khan ka rak ti cang tiah a chim.
'Kan chimmi hi a hmaanmi an si. Sungthoh bu nih Russia an si ko timi hi fiang tein an theih hna. DNC e-mail a hackmi hna kha Russia an si ko. Cucaah kan caah a herh tukmi cu hi bantuk riantuannak hi hmailei ahcun kan kham hrimhrim hna an hau' tiah a chim. 'Thim lioah khan chim ka duh lo. Thimnak min chaitter ka duh lo caah atu ah ka chim' tiah a chim chih.
Computer hacknak an tuahmi hi Clinton sunghter an duh ruangah maw a si tiah bia an hal tikah fiang ko in a let hna lo. A chimmi cu 'mipi nih ruat ko u' a ti. September ah khan Taluk a tlawn lioah khan Putin sinah a rak chimmi cu 'hi bantuk thil nan tuahmi hi ngol cang u' ka ti tiah a chim. 'Hi bantuk thil an tuah ti lonak ding ah cun hmaitonh in chimh kha a tha bik tiah ka ruah' a ti.
'An ngol lo ahcun fak tuk in kan lehrul hna lai tiah President Obama nih Putin a ti. Taluk President Xi Jinping he biaruahnak an ngeih zong pah zong ah hi kong a chim chih. Harvard University leiin Joseph Nye nih 'hi bantuk kongah fek tein US kan dir awk a si. Russia an siah a dangdang an siah hi bantuk riantuan cu kan cohlan khawhmi a si lo ti hi kan fianter ding a si' a ti ve.
A chim thanmi cu 'hi bantukin kan cungah rian an tuan lengmang i, fak nawn tein kan lehrul hna lo ahcun an tuah than lengmang lai. Russian lawng nih hmanh nih tuah ti loin a dangdang an chuak chin lengmang lai, cucaah kan i biatak hrimhrim a hau' tiah fak ngaiin a chim ve. Ref: VOA News.