US President thimnak cu a dih cang. A riantuantu upa caah minung zeimawzat a thim hna hnuah atu cu American mipi sinah 'Kan I Lawm Tuk' tiin lunglawmh biachimnak khual an tlawn cuahmah lio a si. Nilini kha Ohio i, Cincinati ah bia an chim.
Vice President Mike Pence a chim hmasa. A bia hramthok in tapung kong a chim. ISIS kan hloh dih hna lai i, tapung riantuannak a tamnak ram in mipem paoh cu kan kham dih hna lai. Obamacare kan hrawh lai i, American mipi herhning in kan ser lai. Vampang zong kan ser lai i, ningcang lo mipem zungzal in kan kham cang hna lai.
Pathian nih luatnak a kan pekmi kan zalonnak a rungvengtu Second Amendment a dirkamhmi Supreme Court biaceihtu kan thim lai a ti. President thimmi Donald Trump a vun sawm i Trump nih a caan a vun lak colh. 'Kaa Lawm tuk' tiah chim ding in nan sinah ka ratnak a si tiah a voikhatnak ah a chim hmasa.
A chimmi cu 'President rian cu America himter hi a si. Hihi a sang bikmi ka hmuitinh a si' Trump nih a chim. A si khawh chungin kan ramchung ah tapung kan luhter hna lai lo. Muslim ram in minung a tomtom in an rak lut. Ahodah an si kan thei hna lo. Khawika in dah an rat timi zong kan thei hna lo, zeidah an ruahnak a si timi zong kan thei hna lo.
Kan khamh hrimhrim hna an hau a ti. ''Thihnak' tiah a auh hna. Hi thihnak hi kan kham a hau a ti. Kan ramchung ah a lutmi nih a kan dawt ding a si i, a kan huat ding hrimhrim a si lo tiah a chim chih. Ramdang cozah kan thla ti hna lai lo. Kan i tinhmi cu himnak le fehfuannak a si lai. Ramdang ah buainak kan ser lai lo; kan chuahter fawn lai lo, zeicatiah kan ram ser than kan duh.
Atu hi caan cu a si a ti. A chim thanmi cu 'zeitik hmanh ah pumpak miaknak nih American mipi a chawhkenh ti hna lai lo. American mipi hi a pakhatnak peng ah a um cang lai' tiah a chim. Fak piin a nolh thanmi cu 'naite i American aalaan an khanghmi kong hi a si. American aalaan a khangmi cu dantat an si lai' tiah Trump nih a chim than.