Tuan deuh ah khan cun Iraq ralkap lei upa nih an ralkap a thimi zeizah dah an si timi chim an duh lo. ISIS kan tei tik lawng ah kan chim lai tiah CNN sinah an chim. Asinain ISIS an dohnak hna ah Iraq le an hawile ralkap a thimi hi an tam chin lengmang ve.
October ah a thimi naak in November ah a thimi hi a let thum in an tam tiah UN lei upa nih an chim. A thimi chungah hin Iraq ralkap, police ralkap, Kurdish ralkap le an hawile dangdang hna an si. Kan hnu thla khan cun Mosul khua chungah an lut cang.
Lam ton- lam ton in an i kap, lam kam ah bom chiahmi a tam, a thli in sniper meithal in an rak kah hna tikah Iraq ralkap caah a rak fawi ve lo. Mipi hrimhrim zong ISIS nih an i runvennak caah an hman tikah ral le misa thleidan a har. Mipi zong an thi tam ve.
November chungah ISIS nih mipi 900 an thah hna i, 930 an hliamh hna tiah UN nih a chim. 76,000 hi ral zam an si. Mosul khua chungah a um i, a zam kho lomi hna cu an harsa ngai hna. Dinti zong an ngei lo. Ral lak ah an um ko hna tiah UN nih a chim chih.
Iraq ralkap nih ni 45 chung an doh cang hna. Mosul zong an kulh dih cang. Asinain duh ning in an luh hnawh kho hna lo. Motor chungah bom chiahmi a tam pinah ISIS nih a thlithup in a phunphun in an doh ve hna. Duhsah tein an kal hnawh hna. Iraq ralkap upa nih a chimmi cu:
Inn khat hnu inn khat in kan doh hna, a thla zong kan rau ko lai, kan ralkap zong an thi lai a thong in an thih lo hmanh ah a za tel cu an thi lai. Asinain an thi a lin cio hna. Mosul kan lak hlan tiang kan doh hna lai tiah Gen. Abdulwahab al Saidia nih a chim. Ref: CNN.