US President a tuan a dongh thla ah President Obama nih Russia cu US thimnak ah thlithup computer riantuannak in nan i tel tiah a vun phomh hna. Russian diplomats minung 35 cu US in 72hrs chungah nan chungkhar in nan chuak lai tiah nawl a pek hna. Russia embassy zung he aa tlaihmi pahnih a kharter chih hna.
Russia zung pahnih a khartermi hna hi New York le Maryland ah an si. Cheukhat zumh ning ahcun Russian thlithup riantuannak le cawlcanghnak an hmanmi an si an ti. Mah ruangah President Obama nih a khartermi hna a si an ti. Hi bantuk hi ramdang zong an ton lengmangmi a si. Mi ramdang ah a hleihluat cawlcanghnak ngeih hi aho ram hmanh nih a onh lo i, a duh lomi a si.
Russia leiin kan lehrul ve lai an ti. Russia nih an chim thanmi cu US thimnak ah kan i tel lo; Trump teinak caah thlithup rian zong kan tuan lo an ti. Obama le a cozah santlaih lo a si tiah an ti hna. Nilini ah UK in Russia embassy nih twitter in compei kebei hmanthlak an langhter i, Obama a si an ti. 'Compei kebei' tiah Obama cu an auh i, an soisel.
President Obama le a cozah thinhunnak bik cu Democratic National Committee le Clinton campaing manager e-mail an hack piakmi ruangah hin a si. Presiddent Obama nih a chimmi cu 'a hlanken tein Putin zong ralrin ka pek cang. Nan ngol lo ahcun fak tuk in lehrul kan tuah te hna lai' tiah Taluk kan i ton lio zong ah ka chimh cang' a ti.
Khatlei in President thimmi Donald Trump nih phundang piin a rak ruah ve. Teinak ka hmuhmi hi tuaitam an ka timh caah a si a ti. January 20 ah President biakamnak a tuah cang lai i, US President a si cang lai. Ref: The Sun.