Nigeria khua Maiduguri khua ah Boko Haram tapung chungtel a simi nu pakhat cu mipi tam biknak hmun ah nunnak thap in bompuah aa tim i, a bom a puah khawh lo caah mipi nih an thah. Nigerian police nih an chimmi cu nu pahnih an si i, pakhat cu nun thap in bom a puah manh an ti.
Pakhat deuh tu cu a bom a hmanhmi a that lo caah a puak kho lo i, mipi nih an hmuh cangka in an zuan hnawh i, tha lo taktak in an tuk, an velh i, an den hnu cikcek ah a thi an ti. Minung an tamnak hmun a si tikah minung a tam khawh chung tam in thah aa timmi an si tiah an zumh. Nu pahnih hi Nigerian tapung Boko Haram chungtel an si lai tiah an zumh.
Boko Haram tapung bu hi Nithlak ram a hua i a doh ngaimi an si; a hleiin Nitlak ram nunphung le cacawnnak a doh taktakmi an si. Tu zarh chungah khan President Muhammadu Buhari nih a chimmi cu Sambisa Ramlak ah a ummi Boko Haram tapung kan thawl dih cang hna tiah a chim. 'Thuhnak hmun hmanh an ngei ti lo' tiah a chim chih.
Nigerian ralkap lei upa pakhat zong nih a chimmi cu 'Tapung zong an zam dih cang' a ti. President Muhammadu Buhari nih ralkap upa hna cu 'dawi hna u law an tuahsernak bantukin bia nan ceih hna lai. Boko Haram kan hloh dih hna lawng ah teinak kan hmu lai' a ti. Boko Haram nih a thahmi hi 20,000 leng an si cang.
Kum sarih chung ramchung mipi an hran hnawh hna hnuah ralzam hi million pahnih leng an si cang. Sharia Upadi ser a duhmi zong an si i, an ram hi Islamic ram ah ser a timi zong an si. 2014 ah Nigeria i Chibok khua sianghngakchia 276 a fir hna. Ref: The Sun.