Israel Prime Minister Netanyahu nih Prime Minister laksawng cu Shin Bet hruaitu Nadav Argaman sinah a pek. Israel ramchung himnak kongah tuanvo a lami ramchung sungthoh bu an si. Riantuan an thiam pinah ramchung him tein a kan chiatu an si tiah PM laksawng pek an si.
2016 chungah tapung nih ramchung ah dohnak chuah pi an timhmi voi 400 leng kan theih i kan hrawhpiak hna tiah Shin Bet hruaitu Nadav nih nihnihni i laksawng peknak le cohlan ah a chim. Laksawng peknak cu Shin Bet headquarter ah an tuah i, a kut tang riantuantu zong Nadav nih a thangthat hna.
'An thiamnak cung kan i lawm tuk, technology leiin kan thanchomi cung zong ah kan i lawm tuk, minung leiin thiamnak le teimanthluknak cung zong ah kan i lawm' tiah a chim. A chim thanmi cu 'tu kum chung lawng ah tihnung in doh a kan timmi tapung riantuan 400 leng kan hrawhpiak hna tiah a chim.
Prime Minister Netanyahu zong aa tel ve. Technology leiin a siah sungthoh leiin a siah internet leiin a siah kum hnih chung Israel ram an runvennak ah hlawhtlinnak ngan pi an chuah pi i, him tein Israel an umtermi cungah PM nih Prime Minister laksawng a pek hna. Laksawng an ngahnak ruang bik cu ramchung ah a thlithup in pumpak in mi thah le lainawn le bompuah ah a vakmi hna an tlaih khawh manh lengmang hna ruangah a si.
Israel ramchung kip ah Shin Bet nih rian an tuan i, kan ram him tein an umter i, kan mipi zong him tein an umter hna. Shin Bet riantuannak ah aa telmi nu he pa he upat awktlak nan si, nan raltha, nan thiam, riantuan ningcang zong nan thiam. Upatnak kan pek hna i, nan cungah kaa lawm tuk' tiah PM Netanyahu nih a thangthat bia le lunglawmhnak bia a chimh hna. Ref: TOI.