Syrian President Assade cozah dohtu raltho hna dornak Aleppo cu Russia le Iran bawmhnak in an chimh khawh deng cang. Syrian cozah ralkap lei an hran ning chim pit a si. Mipi zong an thah hna i, aa apmi ralkap zong an thah hna; nu zong an tlaihhrem hna. Cheukhat cu an tlaihhrem hna hlanah anmah tein an i that hna.
Aleppo khua cu a cim in a cim dih. Syrian cozah ralkap nih raltuknak vanlawng he tank he an phomh hna i a cim in a cim dih. An lak cang lai. Asinain Aleppo ah a tangmi mipi a ting leng a ummi ah cheukhat cu ralkap kut in an tuar i an tem tuk. Nu hna le an fanu le hna nih tlaihhrem lai an tih tuk ah hin anmah le anmah tein an i that thluahmah hna tiah theih a si.
Dohtu lei raltho hruaitu Abdullah Othman nih a chimmi cu Syrian ralkap an rak luh thluah tikah an kan hramh pinah an kan tlaihhrem lai tiah an phang hna i, mah tein an i that hna a ti. 'Tu zing lawng hmanh ah tlaihhrem tih ah mah tein aa thatmi an zate in minung 20 an si tiah a chimh. Nurse sayamah pakhat nih amah tein aa thah hlanah ca a tial takmi cu 'President Assade ralkap bu nih tlaih hrem ka duh lo' a ti.
US journalist Bilal Andul Kareem nih a chimmi cu mipi bawmhchanh ding ah a kalmi hna hmanh raltuknak vanlawng in an kah hna a ti. An raltuknak vanlanwg hman ning hmanh hi a sawhsawh a si lo. Bawmtu he mipi he ngan loin an phomh thluahmah hna a ti. A donghnak ahcun kum ruk chung raltuknak cu Assade teinak in a dong a ti.
Tuan deuh ah khan mipi bamwhnak kawl duh ah UN tlangtlaknak in kahdaihnak an ser. Nizan nihnihni ah khan an tuah khawh, asinain nihin ah kahdohnak a chuak than. Turkey President Erdogan nih President Putin ka chawnh lai i, mipi luatnak lam kan kawl lai a ti. Minung 50,000 leng ral chungah an tang. French President Francois Hollande zong nih him tein kan chuahter hna ding an si a ti.
UN zung pi ah US ambassador Samantha Power nih Russia he Iran he khuai henh in a rak henh ve hna. 'Nan ningzak lo maw, mipi nan thah hna' tiah fak taktak in a rak phomh ve hna. Ref: The mirror.