President thimmi Donald Trump cu Alabama state ah 'kaa lawm tuk' tiah lunglawmhnak chim awk ah a tlawn lio a si. Mipi nih an vote i, President a tling. Lunglawmhnak biachim khualtlawnnak (Thank Your Tour) a tuah cuahmah lio a si.
Evangelist minthang Franklin Graham nih a zulh i, Trump ca he America hmailei ca he thlacamnak a ngeihpiak hna.
'Nizan ah President thimmi Donald Trump le Vice President Mike Pence caah thlacam kho ding le Pathian nih kan ram thluachuahnak a peknak ding ah thlacamnak kho ding in mipi a thongthong he caan tha ka hmuh caah kaa lawm tuk. 'Kan i lawm tuk' ti mipi sinah chim awk ah an khualtlawn donghnak a si. Keimah zong thlacam ding in an ka sawm ve' tiah a facebook ah a tial.
'Thla khat hnu cun Donald Trump cu kan president a si cang lai. Cozah a serhnak ah fimnak a herh i, kan thlacamnak zong a herh. Donald Trump a vote mi nan siah a vote lomi nan siah forh ka duhmi hna cu hmun khat ah ra in thla kan cam ti hna lai. Kan Pathian cu a mipi hna thlacamnak a thei i, rian a tuanmi a si' tiah forhfialnak bia a chim.
Nikhatni cun elector nih vote an thlak cang lai. Tluang tein an vote ko lai tiah ka zumh a ti. President thimmi Donald Trump nih teinak a hmuh ah khan Graham nih a chimmi cu 'kan nunchung ah political tiluan aa thlen nganbik a si' a ti. Thlacamnak a ngeihpiak lai ah a chimmi cu 'thimnak phichuak nan cohlan lo zongah, ka hawi a simi President thimmi Trump caah thlacam nan ka bawmh lai ti ka zumh' tiah mipi hmaiah a chim.
Trump a duh lomi nan si zong ah tih ding a um lo. Nan tha zong chia hlah seh. Thlacamnak nih a tuah khawh lomi a um lo a ti. President thimmi Doanld Trump nih kan America hi a liannganter than lai. Ka zumh ko. America ah zeihmanh cang seh law, a pakhatnak ah Pathian pennak hi kan kawl hmasa ding a si' a ti. Ref: TCP.