President thimmi Donald Trump le Taiwan President Tsai Ing-wen phone chawnhnak an ngeih hnu cun Taluk nih Trump dong loin an soisel i, an doh ngai cang. Taluk cozah media nganbik Global Times nih cun 'vawleicung ah ram thawng bik a simi hruainak ding ah ruahnak ngei lo Trump' a ti.
An tial thanmi cu 'US President nih a um hnga ding in a um lo. Inn Raang pi a umnak ding ah thla khat lawng a tang cang, asinain President dirhmun zong a thei lo. Vawleicung ram thawng bik a simi zeitin dah ka hruai ning a si lai timi zong a thei lo' tiah fak ngaiin a phomh.
US le Taluk pehtlaihnak a that lo ahcun vawleicung daihnak an hrawh ngai te lai tiah zumh a si. Global Times nih a tial thanmi cu 'President thimmi Donald Trump ziaza hi a thinh lo ahcun Taluk le US entainak hi a lin ngai te lai a ti.
A peh than thanmi cu 'President a tlin hnu zong ah Taluk a tuahto ning in a tuahto than ko rih ahcun Taluk zong aa sum kho ti lai lo. Taluk cozah zong timh cia in a um cang lai a ti. A tial than rihmi cu 'President biakamnak a tuah cun Taluk nih zeimaw tiin a cawnpiak a hau ve te lai' a ti than.
Electoral College cu President thimnak vote an thla cang lai. President thimmi Donald Trump President sinak fehternak vote thlak a si. Asinain Trump ka vote lai lo a timi hi elector 20 hrawng an si. Hi lio caan theng te ah Global Times nih fak ngaiin Trump cu President dirhmun a tlai thiam lo tuk tiah an rak soisel i, an phomh len ve. Ref: The Sun.