Turkey ah Russia in rak thlahmi Ambassador pakhat Karlov Andrei Gennadyevich cu a lennak ah nikhatni ah an kah i, a thi. Naite ah Russia le Trukey karlak ah thil cang biapi a pahnihnak a si. Tuan deuh ah khan Russian raltuknak vanlawng an kahpiak cang.
Atu Russian ambassador an kah tikah Russia le Turkey karlak pehtlaihnak a rawk than ngai hoi lai. Kap hnih raltuknak hmanh a chuahter lai tiah a zummi an um. Turkey President Recep Tayyip Erdoğan le Russia president Putin karlak ah theihthiam lonak fak ngai a ummi cu a daih leiah a panh cang an ti.
Asinain atu ah an ambassador Karlov Andrei Gennadyevich an kah thanmi cu a sawhsawh a si ti lai lo. Akaptu hi ahodah a si ti an thei rih lo. Turkey le Russia hi Syria kongah an hmuh ning aa dang ngai. Turkey nih Syria President Assad hi thlak an duh i, Russia nih a dirkamh ve; cuticun kap hnih karlah entainak a um lengmang.
Naite ah khan Turkey nih kan van hmun ah a phan tiah Russia raltuknak vanlawng tla lak in an kahpiak. Fak ngaiin hrocernak a chuak colh. Russia ah thinghtei an kuat tawnmi cu Russia nih an kham hna. Zalong tein khualtlawnnak an kham, cun Turkey ah khualtlawnnak an phih. Expert nih cun 'tu chun kahnak nih kap hnih pehtlaihnak a hrawh ngai rih lai an ti.
Russia raltuknak vanlawng an kah hrawng kha cu linhsatnak a fak tuk nain an dai than i kap hnih pehtlaihnak an vun thatter than ngai. Turkey President Erdogan le Putin zong Russia St. Petersburg ah tonnak an rak ngei. Asinain Syria kongah ruahnak dangdang in an um thiamthiam ti a si; atu ah a ambassador an thahpiak than hna tikah Russia nih zeitin dah a chim than te lai?Ref: The express.