German Chancellor Angela Merkel nih refugee 1 million leng a ramchung ah a luhtermi hna cu a tihnung tukmi palh cikcek a si. Mrs Markel cu Europe ram ah hawihlei in a biapi tukmi hruaitu a si. EU cu Germany caah a motor bantuk a si tiah Trump nih a chim.
Britist le German newspaper nih biahalnak an tuah i, Trump nih a chimmi cu 'chawlehthalnak kongah US caah thathnemnak a ummi ka tuah lai i, kan ramri hi ka thawnter lai. Vawleicung ram he chawlehthalnak kan tuahmi hi ka sersiam than dih lai i, a hleiin Taluk kong hi ka zoh khun lai' a ti.
Ka cozah nih zalong tuk in chawlehthalnak phung kan hmang ti lai lo. Chawlehthalnak kongah a Smartmi cozah kan si lai tiah a chim chih. Russia he pehtlaihnak kongah zeitin dah na ruahnak a si tiah an hal i, Trump nih a lehmi hna cu 'Russia hi nuclear hriamnam kong ka ceih pi lai. A nuclear hriamnam ka thumhter lai i, dan kan tatmi ka lakpiak ve lai' a ti.
Middle East kong an hal than i, US nih 2003 ah Iraq an rak lakmi kongah a lungtlin lonak a chim than. Kan ram tuanbia ah Iraq tuk ding in biachahnak an rak tuahmi cu a palh bikmi a si tiah President thimmi Trump nih a chim.
Washington Post nih biahalnak an ngeih ve i, Obamacare kong an hal. Trump nih fiang tein a langhter lo nain a lehmi hna cu 'Obama healthcare program cu kan thlen cuahmah lio a si. Kan i lim deng cang. Mi kip caah kan ser lai i, a man zong kan niamhter deuh lai a ti. Health Secretary caah Tom Price hi a thimmi a si.
Twitter kong an hal than i, 'President ka tuan chung zong ah ka hman lengmang lai. A dingfel lomi news paoh cu 'bing' 'bing' 'bing' ka phomh lengmang ko hna lai' a ti. 'NATO cu a hlun cang. Asinain ka caah a biapi ngaimi a si i, aa tluk cio tein kan liam cio cang lai' tiah NATO kong zong a fianter than. Ref: BBC.