Brazil thonginn ah drug bu (Drug Gang) karlak ah fak tuk in lainawnnak a chuakmi nih Brazil mipi cu khauruahhar le thinphan in a chiah hna. Thonginn chung i an i thahnak hmanthlak hrimhrim cu tih a nung tuk. Minung 31 ruak cu zoh ngam lo ding tiang dengdeng in an tuah hna.
Cheukhat cu an thin le an chungril tiang in an chuah dih hna. Cheukhat cu an lu an tan hna. An buainak ruangah hi drug bu pakhat le pakhat karlak ah a cangmi a si. Drug a eimi an si fawn tikah a bubu in an um hna. Roraima khua i Monte Cristo thonginn ah a si. An thahmi hna kha cheu ningcang loin an tuah dih hna hnuah an pon hna.
Thonginn hi minung 750 umnak ah 1,475 tluk an chiah hna. Police lei upa Uziel de Castro nih cun drug bu ruangah buainak hi a chuakmi a si tiah a chim. Tu zarh chungah a voihnihnak an buai a si. Zarhpini zanlei ah an rak buai than i drug bu anmah le anmah an buainak ah minung 60 hrawng an thi. Hi buainak hi Anisio Jobin thonginn ah a si i, dinti harsanak in aa thokmi a si.
Chungkhar hna cu an lungrawk tuk. Thonginn leng in an hngah hna i, an chungkhar a thimi pawng an theih tikah an ngaihchia tuk hna. Thonginn leng ah tah le hram in an khat hna. Monte Cristo thonginn in a zammi hna cu ram lak an phak hnuah selfie in hmaan an i thla i, social media ah an rak tar hna. Brazil police nih an dawi hna i, minung pahnih cu an kah khawh hna. Ref: The sun.