ABC news nih President Obama cu bia an hal i, Trump he an i tonnak kong a chimh hna. 'US President riantuan le Inn Raang in riantuan cu chungkhar business riantuan bantuk a si ti lo tiah Trump ka chimh' tiah Obama nih a chim. Russian thlithup riantuannak kong zong a chimh hna.
ABC News George Stephanophoulos nih Obama cu bia a hal i, Obama nih a lehmi cu 'Trump hi kau piin aa ong ko. Ruahnak zong pek khawh a si ko. Trump lungthin ah cam seh tiah ka chimmi cu campaign tuah le cozah hruai cu aa dangmi a si. President biakamnak a tuah hnu cun 'vawleicung ah a ngan bikmi bu (organization) tuanvo cu a kut cungah a um cang lai' tiah a chim.
President Obama nih a chim thanmi cu 'Kan cozah cu chungkhar business kan tawlrel bantukin tawlrel khawh a si ti lo. Senate office kan tawlrel bantuk zong in tawlrel khawh a si ti lo. Keimah zong senator pakhat ka rak si. Cun President ka si. Na pawng ah a thawngmi team um a herh tuk. Biachahnak hmaan na tuah khawhnak ding ahcun na riantuan ti hawi upa le thil umkal ning a theimi naa bochan hna a hau tiah a chim.
Trump hi zeitin dah na hmuh ning a si tiah Obama cu biahaltu nih a hal than. 'A policy kongah thlen chuak in a ruahmi a um lo tiah ka ruah. A pawngkam ah tuaktan kho le theihhngalhnak ngei tampi a ngeih hna ahcun a hmaanmi biachahnak a ngei kho ko lai i, a ngeih hna lo ahcun a let-ti-ling in a si ko lai tiah Obama nih a leh.
Obama nih a chim thanmi cu 'kan sungthoh bu hna hi caan tam tuk pek in rian a tuanmi an si. Theihhngalhnak an ngei tuk. Asinain a caan ahcun an theih lomi zong a um ve ko. An i ralring tuk fawn. Russian hack nak kong zong ah an theih ko. Report an pekmi zong kan zoh tikah hram tampi an ngei. Keimah zong nih ka zumh hna. Hi bantuk minung kan pawmg an um tikah zeitin dah bia kan chah lai timi kan theih' tiah Obama nih a chim. Ref: TCP.