Al-Qaeda tapung an siah ISIS tapung an siah an ralkap hna cu President thimmi Donald Trump president biakamnak puai doh ding in an forhfial cuahmah cang hna. Washington DC ah hlunghlai taktak in President Biakamnakpuai cu ningani ah tuah a si lai. Tapung bu kip nih an target ngan bik ah an chiah.
President thimmi Donald Trump hi Muslim kongah a lungput aa dang ngaimi a si. Mipem kong a siah ISIS kong a siah a lungput le a ruahnak tam pi a chim cang hna. President biakamnak a tuah ni cu thinphan pi a um ngaingai. Inn Raang hmaiah minung a thongthong in an rak kai lai i, TV in million in vawleicung ram kip in an rak zoh fawn lai.
United States of America President biakamnak a voi 45 nak a si lai. Daily Star nih a chim ning ahcun tapung bu lei zong in timhnak an ngei ngai tiah a ti. Magazine Rumizeh ah ISIS nih an tialmi cu 'ral thiang a domi kan ralkap hna, nan tuah khawhmi paoh tuah u; tinhmi tha tein ngei u law style taktak in nan ral doh hna u' a ti.
Al-Qaeda lei zong in an ralhrang pawl an forhfial cuahmah cang hna. Minung an tam biknak hmun ah a puak khomi drone nan hman lai an ti hna. Mipi nan target hna lai i, inn nan target lai lo an ti fawn hna. Asinain President biakamnak ni ahcun security tha tuk in an chiah hna lai. President Obama nih a ramchung security a ton dih cang hna.
President le Vice thimmi Donald J Trump le Mike Pence biakamnak ah a kai dingmi mipi an tam lai tiah zumh a si. 2009 i President Obama biakamnaka tuah lioah a rak kaimi mipi an zate in million 2 leng an si. Ref: The sun.