Israel Prime Minister Netanyahu nih Jerusalem ah US embassy thialnak kong hi a chim tuk theng bal lo. February thla chungah President Trump he ton ding in timhnak an ngeihmi ah hin zeidah an ceih bik te lai timi cu cuanh cio a si.
Israel security kong an ceih lai i, embassy thialnak kong zong an ceih lai tiah zumh a si. President Trump nih vampang sak ding in min a thutmi cu PM Netanyahu nih a thangthat ngai. Egypt le Israel ramri kan sakmi bantuk a si a ti.
PM Netanyahu nih a chim thanmi cu 'Jerusalem ah US embassy thial a si lai timi hi kan hmuh ning peng a si i, hmailei zong ah a si peng lai' tiah a riantuan ti upa he tonnak an ngeih lioah a chim. 'Jerusalem hi Israel khuapi a si i, US embassy zong a um awk a si i, embassy dangdang zong an um lai a ti. Embassy thial a duhnak fiang tein a chimh hna.
'A rauh hlanah embassy tam deuh cu Jerusalem ah an um cang lai' tiah PM Netanyahu nih a chim chih. Asinain atu tiang ah cun Tel Aviv ah embassy an um dih hna. US or UN tbk nih Jerusalem hi Israel khuapi a si ko tiah an cohlan khawh ahcun official tein Jerusalem cu Israel khuapi a si cang lai.
President Trump nih Jerusalem ah US embassy thial ding in a chim hnu cun Israel mipi lung zong a tho ngaingai. Asinain khatlei in Muslim ram an thinhung. Embassy an thial taktak ahcun US nih Jerusalem hi Israel khuapi a si ko ti a cohlannak a si lai caah Israel le pawngkam ram cu an buai taktak te ko lai tiah zumh a si. Ref: TOI.
Zeiruangah US Embassy Thialnak An Buai Pi Tuk? Politics Mit In Fianternak
---------------------------