Nihnihni ah Republican upa nih Congress ah Embassy thial ding kong an chuah pi cang. Jerusalem hi Israel khualipi ah kan cohlan cang lai i, Tel Aviv in Jerusalem ah kan embassy zong kan thial cang lai tiah biatung an chuah pi cang. Israel le Palestinian karlak ah buainak a ser ngai te lai tiah an zumh.
Congress ah embassy thial ding in biatung a chuah pitu cu Nevada in Senator Dean Heller a si i, Marco Rubio le Ted Cruz nih an dirpi. 'Jerusalem hi Israel miphun zungzal khualipi a si. Hi hmun ah hin Amerca Embassy a um awk hrimhrim a si' tiah Congress i biatung an chuah pi lioah Rubio nih a chim.
'Chan pi chan hnih chung US president kip an hrialmi Congress le Trump nih a tlinter caan a si cang' tiah a chim chih. Ted Cruz nih a chim thanmi cu 'vanchiat ah Obama le a cozah nih Israel an ralchanhnak hi a fak tuk i, Jerusalem ah America embassy a um awk a si ti chim hmanh hi cheukhat caah launak tiang a chuah pi kho dingmi thil ah a cang' a ti.
Biatung an chuah pimi cu 'Jerusalem Embassy and Recognition Act' ti a si i, 1995 ah Tel Aviv in Jerusalem ah thial ding in an chah cangmi kha tlamtlinter cang u' ti a si. 1995 ah thial ding in Congress nih an rak ceih cang nain US President Bill Clinton in Obama chan tiang an thial hlei lo, aruang cu Israel le Palestinian karlak ah buainak a chuahter tuk lai timi an phang.
Cu ruang ahcun US President kip nih thialnak ni le caan an thawn than lengmang i, atu tiang thial lo peng a sinak a si. America upadi nih cun President nawl a onhmi hna cu 'thla ruk tiang ni le caan thawnnak nawl a onh hna. Mah ruangah a tu thiang an thawn lengmang pengnak a si. Ref: CNN.