Iraq ralkap lei upa nih ningani ah an chim cang. Islamic State dirh aa tim i, mipi a that i, harnak sertu ISIS hi sau an nung ti lai lo. ISIS hmunkhur tha bik a simi Mosul zong 70% cu kan lak khawh cang. ISIS kan dohnak ah khuami kip an si khawh chung in an kan bawmh a ti.
Zarh hlei hnih chung kan doh cangmi chungah khuami kip nih an kan bawmh i hmailei ah kan fong chin lengmang cang tiah Lieutenant General Talib Shaghati nih a chim. Mosul in nichuah lei kam 65-80% poah cu kan chuh cang hna. A ra laimi ni le caan tlawmpal in cun Mosul in nichuah lei kam paoh cu kan lak cang lai tiah a chim chih.
ISIS uknak tangah nitlak lei kam paoh cu a ning tein a tang khan a si rih. Mipi kha an phaw le an i runvennak ah an hman hna tikah hmaiah kan fong kho hrim lo a ti. ISIS nih Mosul Dam hi an tlaih rih tikah fak tuk in kan kah hna ahcun a rawk sual lai i, 1.5 million an thih lai pinah mei loin mipi kan chiah hna lai. Cucaah ralrin taktak in kan doh hna a hau a ti.
Sweden i Lulea University professor Nadhir al-ansari nih a chimmi cu 'Mosul Dam a cimh ahcun Iraq cungah nuclear bom thlak bantuk a si ko lai' a ti. Report nih an chimmi cu 'Mosul hi an dum dih cang tikah tangka leiah an harsa ngai cang. Thla khat ah £280 an pek hna i, tangka a har tikah rawltam in an um cang hna. Mipi an siah an ei cemmi cu aalu a si.
Iraq leiin ralkap upa pakhat nih a chimmi cu 'kan lak duhmi kan lak khawh dengmang cang. Kan kut cungah Mosul a phan dengmang cang. Thla thum chung ahcun kan lak cang lai. Kan ralkap zong an thiam i, a har tukmi raldohnak ah teinak leiah kar an hlang chin lengmang tiah a chim chih. Ref: The sun.