President Obama cu nithumni ah Congress ah a leng. 'Obamacare kongah Republican nan bawm hna lai lo' tiah Obama nih Democrats upadi sertu cu a chimh hna. Inn Raang in a chuah lai ah Congress a len zong a si lai i, a donghnak a len zong a si cang lai.
Republican Party pawl nih min ka thut cangmi Obamacare an hlonh than sual lai tiah a vun rat hnawh i, fehter than a rak timhmi a si. Inn hrenh chung meeting ah Obama nih democrats pawl cu 'Repulican nan i teiter hna lai lo. Obamacare hi nan thlenter hna lai lo' tiah fak ngaiin a chimh hna tiah chunglei kong a theimi nih a chim.
Congress inn chung a rak luh pah ah Obama nih mipi sinah a chim pahmi cu 'American mipi hi tha tein zohkhanh hna u' a ti hna. Mipi zong a chawnh pah; an kut zong a tlaih pah hna.
Vice Presiden Mike Pence zong Congress thar an i pumh a voihnihnak ah a rak leng ve. Republican upadi sertu hna he tonnak an ngei ve. Report tu hna sinah Mike Pence nih a chimmi cu 'palh hrimhrim hlah u. American mipi sinah bia kan i kamh ning tein kan tuan lai. Obamacare kan remh lai i kan thlen lai' tiah leklak ngaiin a chimh hna.
'Kan cozah pum nganter deuh ti loin health insurance man kan niamter deuh lai' tiah a chim chih. Congress thar an thutnak nihnih lawng hmanh ah Obamacare nih a buai tuk cang hna i, an buai ngai te ko lai tiah zumh an si. Zei can tiang dah Obamacare nih a buai pi te hna lai timi theih a si ti lo.
President Obama zong Congress ah a democrats he lawng tonnak an ngei i, Mike Pence zong a Republican party he lawng in tonnak an ngei ve. Hi bantuk thil cu ruah awk ngai a si ko. Hmun khat ah an thut ti lo ahcun zeitin dah thil kan thlen khawh lai' tiah Senator Joe Manchin nih a chim. 'Tutan ah Obamacare kan thlen lo ahcun a ra laimi kum tiang buainak a chuahter lai' tiah Sen. Rand Paul nih a chim. Ref: CNN.