Melissa Dohme 20, hi Florida ah a ummi a si.
A tlangval nih voi 30 leng namte in a sawh hnuah a thi cang tiin a kal takmi a si. Asinain a dam than. Ka nunchung ah pasal ka ngei kho ti lai lo ti aa ruah i, harnak a tonmi kongah lungrethei le lungfak ngaiin a um lioah ruah lo piin dawtu pasal tha aa hmuh than. A tanglei ah Melissa Dohme tuanbia rel ve.
A tlangval nih voi 30 leng namte in a sawh hnuah a thi cang tiin a kal takmi a si. Asinain a dam than. Ka nunchung ah pasal ka ngei kho ti lai lo ti aa ruah i, harnak a tonmi kongah lungrethei le lungfak ngaiin a um lioah ruah lo piin dawtu pasal tha aa hmuh than. A tanglei ah Melissa Dohme tuanbia rel ve.
Ka pasal nih namte in a ka sawh hlanah college a kaimi ka si i, sizung ah rian zong full-time in a tuanmi ka si. Ka saduhthahmi cu Nurse riantuan hi a si. Robert Burton he kan i duh i, nuamhseih le capo a duh i, a thiam ngaimi a si. Phone chawnh loin kan um kho lo; message kuat lo zong in kan um kho lo. Kan i duh ngai. Asinain University kai ding in kaa timh hnu cun a ziaza aa thlen ka hmuh. A hnah a ka chuah i, ka santlaih lonak lawng te a chim cang; na kai kho lai lo a ka ti. Hlawhtlinter hrimhrim a ka duh lo.
Lih zong a chim i, ka vun doh tikah a thinhung i, a hro in a hro lengmang. A ziaza a hmaan lo tikah phiat ding in ka timh, asinain a ngaknu pakhat ka si bantukin na ka bawmh awk a si, na ka phiat awk a si lo, na ka kal tak ahcun keimah tein kaa that lai a ti. Nikhat cu zu a ding i, lennak in keimah nih motor ka mongh i kan rak tin. October 2011 ah a si. Inn a ka kharter i, a ka bengh i ka thongh thluahmah. Ka zam i police ka auh hna. An rak phanh in an tlaih. Chungkhar buainak na ser tiin suimilam pahra chung thong an thlak. A donghnak ahcun ka pasal kut in ka luat cang ka ti i ka hnangam tuk.
Thla khat-hnih thum chung cu keimah lawng ka um. Ngaknu dang a ngei cang timi social media in ka theih. Kan pahnih karlak pehtlaihnak a dih hirhiar cang tiin ka ruah i, ka hnangam tuk cang. January 24 2012 zingka ah a ka chawnh i, biaceihnak zung ah ka kal lai ka ti. Kan i pehtlaihnak kan dihter cang lai. Kan i tong ta lai. Atu voikhat te kan ton khawh ahcun zungzal in kan i then thai cang lai a ka ti. A chia-tha thleidan thiamnak ka ngeihmi bia ngeih loin ka um i, a chim bantukin ton ah ka kal. Ka nunchung ah kaa palhnak ngan bik a si. Ka phone le pepper spray kaa put i, kaa rungveng kho ko lai tiin ka kal.
Kan i ton le cangka in a kut aa samh i, kuh a ka timh. Asinain namte a rak i ken i, a vun samh i heh-tiah ngol loin a vun ka sawh thluahmah. A ka sawh kaa hrawnghrang cu a fak ngai asinain ka si khawh chung in ka au i, kaa zawnhnawh chih ve. Ka tuah khawh dingmi paoh ka tuah, asinain ka thi tam tuk a chuah tikah ka celh ti lo i tuang ah ka tlu. Kan pawngah hngachia an rak um i, ka au thawng theih in 911 an auh hna. A motor chungah namtong a va lak than. Thah ding hrimhrim in a rak ka timh. Police an ra lai timi a theih tikah an rat manh hlanah thah ding in aa zuam.
A namtong in a ka tuk, a ka den hnu cun a ka kal tak. Ka thi cang lai tiin kaa ruah. Ka lung cu a fim ko i, ka cawlcang kho ti lo. Caan tha ka pe ko rih tiin Pathian sinah thla ka cam. Police an rak phanh ahcun ka nunnak a dong chin lengmang cang. Ka biachim zong a fiang ti lo. Police nih an ka chawnh len nain tha tein ka let kho ti hna lo. Ka min ka chimh hna i, Robet min ka chimh hna. Ambulance in an ka tlik pi lio zong hi mah hngal lo dengdeng in ka um cang. An ka thlopbulnak zong ka theih pah dih nain ka fiang kho hna lo. A thi lai tiin an ka ruah dih cang. A rannak in tlik pi a hau lai an ti i, Helicopter in a kan zuan pi. .
Operation a ka tuahtu nih an chimmi cu operation an ka tuahnak cabuai cungah atu le atu in ka rak thi. Atu le atu in thaw peknak in an ka cumh than lengmang i, ka rak nung than. Ka hma an fak i, an tam tuk. Ka hmai zong an rawk dih i, hma in an khat; ka lu zong hma in an khat i, thitnak hma lawng te an si. Ka hnar zong an kiak dih. Ka lu le ka hmai cu rawk kel tein a rawk i, a ka tuknak a rak fak tuk hringhran. Operation an ka tuah lioah hin 12 unit thisen an ka hlut. Ka pum chungah thisen a tangmi 7% lawng a si. Ka nun thanmi cu khuaruahhar a si.
Bia zong ka chim kho ti lo. Ka orhlei kut zong a cawl kho lo. Ka kehlei kut lawng a cawl khomi a si tikah Robet kong ka hal hmasami hna cu 'a thi maw, a nung maw, thong ah dah a um' (dead, alive or jail) tiin ka kehlei kut in catlap an ka pekmi cungah ka tial. Ka chungkhar nih na lungrethei hlah tiah an ka hnemh i, an tlaih cang. Harnak an pe kho ti lai lo an ka ti hnu lawng ah ka hnangam.
Robet zong amah tein thah a rak i tim. Thih si a ding i, a motor in vampang a pah, asinain a thi lo. Police nih an tlaih i, sizung ah a ihnak cungah an hren i, police nih an congh. Fawi te ah ka dam kho lo. Voi 32 a ka sawhmi le a kan tukmi chungah 19 hi ka lu, ka hngawng le ka hmai ah an si. Keimah zong ka lo ti lo. Ka ha zong an bau cang; ka sam zong an hrawk dih cang; ka hmai zong an ningcang ti lo. Thlalang kaa bih a voikhatnak hrimhrim cu tap kho lo tiang in ka lung a fak. Kum 20 lawng ka si rih. Ka ruah ah hin celh ding in aa tuah lo. Asinain ka zumhnak a thawng i, keimah lawng vawleicung ah hi bantukin a ummi ka si lo; ka nun hmanh hi thluachuak tuk ka si.
Ka ha a baumi a thar in kaa thlen; ka hmai hmape an tlau chin lengmang. Duhsah tein an dam thluahmah hna. Ka si khawh chung le ka dam bak in cun sianginn ka kai colh lai tiah timhnak ka ngei. Ka nunchung pasal zong ka ngei kho ti lai lo tiah kaa ruah cang. Ka rawk tuk cang i, ahohmanh nih an ka duh lai i, an ka um pi duh lai timi kaa ruah chih ngam ti lo. Ka ruahmi cu keimah bantukin pasal le nih ningcang loin tuahmi hna le harnak a tongmi hna caah bawmtu ka si lai ti hi a si. Nu kip nih upatnak hmuh awk an i tlak, dawtnak hmuh awk an i tlak i, thangthat awk an i tlak timi hi phuan ding le au pi ding in ka lungchung ah a um.
October 2012 ah biachimnak ka ngei. Ka nunnak a rak ka khamhtu Smergency Service Team an rak ra ve. A hmai zarh ah an lakah pakhat Cameron nih ka nu he Fire Departmet ah zanriah ei ti ding in a kan sawm. Ka thatho ngaingai. Mah hnu cun Cameron kong ruah loin ka um kho ti lo. Ka lungchung ah a cam cang timi ka theih, asinain theih lo tein um kaa zuam peng, zeicatiah ka dirhmun kaa theih ve. Bia kan i ruah lengmang tikah kan biaruah a nuam i a thaw tuk. Kan duhmi le kan lungput zong aa khat thiam ngaingai. A phone No. a ka pek. 'Nan caah riantuanmi kan si' a ka ti. Ka ruahmi cu ka cungah a tha ngaiin ka ruah. A hmai zarh leiah kan i tong than. Kan i ton than ahcun suimilam 6 leng kan um ti.
August 2013 ah cun Cameron nih biaceihnak zung ah a ka um pi cang. Robert he kan buainak kong a dih rih lo. Biaceihnak zung ah cun a ka met chih i, ka tih seh tiin a ka zoh chih i, a kan met chih. Asinain tih hrimhrim kaa tim ti lo. A donghnak i kan konglam an kan ceihpiak dih ahcun a lu aa khun i, a ka zoh ngam ti lo. Ka cungah nawl a ngei kho naisai ti lo. A hmailei nunnak caah ruahchannak ngei lo bantukin a um cang. Ka hna a ngam i kaa lawm tuk cang. Ka nunnak thar he biaceihnak zung cun kan chuak kho. Cameron he kan i pehtlaihnak a thawng chin lengmang ve. Chungkhar buainak kong aupi ding le phuan ding in ka nunnak hman ding in pumpeknak ka ngei. Nurse ka cawnmi zong ka ngol i, St Petersburg College ah Managemant and Organization Leadership in Business ka cawng.
Kum zeimawzat a luan hnuah ka au pimi chungkhar konghe pehtlaihnak in Tampa Bay Rays Baseball Game ah biachim ding in an ka sawm. Ka riantuannak upatnak le theih pinak caah tiin an tuahmi a si. Baseball tuknak cungah an ka dirter i, Cameron a rak chuah. A bawlung cungah 'Will You Marry Me' tiin aa tialmi bawlung cu a khupbil buin a ka pek. Ka nunchung ah ka khuaruahhar bikmi le ka ruah bal lomi thil pakhat a si. Biachim awk hmanh ka thei lo. Keimah ratnak ding le timhnak a ngeihmi vialte hi ka ruah tikah zeitluk in dah a retheih hnga. A khup aa bil i a ca aa tialmi te cu a vun ka pek. Ka ruat ka ruat i 'Yes' tiah ka leh ve.
Aa dawh tukmi Diamond kutdonghrolh a ka pek. A hmai zarh leiah cun kan i um cang lai. Robert nih a rak ka tuk-velh lioah a rak rami police le operation kaa tuah tiang in a ka bawmtu vialte an tling dih. Mah ni tluk in thluachuah ka hmuh kha a um ti lai lo. A ka tuk-velh kha cu ni khat te lawng a si i, ka nunnak ah lai a rel kho hrimhrim lai lo. Ka nunchung lai a reltu ding dawtu ka ngeihmi nih a ka lawmh tuk i, ka hnangam tuk. Ref: BCC.