Ningani ah biakamnak a tuah cang dingmi President thimmi Donald Trump a mualpho cikcek hoi than. Nikhatni zan ah Trump nih Brighton khua i rili kam ah a ummi Britist nu Ivanka Majic timi cu Trump nih a fanu Ivanka Trump ah a rel i, twitter in a thangthatnak ca a kuat.
Trump nih aa palh i, a fanu thangthatnak a tialmi cu 'Trump (Ivanka) hi khuaruahhar a si ko. Nu ziaza tha le lungput tha a si' tiah a tial, asinain a fanu Ivanka Trump sinah si loin Ivanka Majic sin tu ah a rak tial diam.
Nihnihni ah Ivanka Majic nih a lehmi cu 'tuanvo lian tukmi a ngeimi pa na si. Twitter na hman ah naa ralrin deuh a hau. Khuacaan thlennak (climate change) kong zong tam deuh na cawn rih a hau' tiah fak nawn tein caan tha lak in a vun cawnpiak pah.
Majic nih CNN sinah a chimmi cu 'Trump nih a twitter hman aa palhmi hi caan lak in Trump tuknak ah ka hman' a ti. A chim thanmi cu 'Trump twitter biaruahnak ah kaa telnak ruang bik cu ka politics hi Trump politics he aa dan ruangah a si' a ti.
Twitter in ca an tial lio hrawng hi Ivanka Majic cu aa hngilh lio a si. Aa thangh ahcun phone chawntu le a rak tweet tu an rak tam tuk cang. CNN ah a chimmi cu 'polite tein ahopaoh leh cio kaa zuam, asinain an dawng tein nihin ah ka let dih kho hna lai lo' a ti. Trump nih aa palh timi an theih hnu caan zeimawzat a kal hnu tiang hmanh ah an delect lo, cun kan palhmi timi zong an langhter. Ref: CNN.