Jordan cozah biachimtu nih nilini ah President Donald Trump nih Tel Aviv in Jerusalem ah US embassy a thial ahcun tihnung tukmi lehrulnak nih a zulh colh lai. A thial ahcun US le Middle East ram vialte pehtlaihnak zong a hrawh dih lai tiah fak ngaiin ralrinnak a chim.
Jordan Information Minister Mohamed Momani zong nih Associated Press ah a chimmi cu Jerusalem ah an embassy an thial taktak ko ahcun kan i pehtlaihnak a hrawh ko lai a ti. Embassy an thial ahcun Jordan caah cun 'Red Line' tanpiak bantuk a si ko lai tiah a chim chih.
Jerusalem kongah extreme tuk in a ruatmi hna caah vun vanthat an ti lai i, fak tuk in buainak an chuahter ko lai. Political in a siah diplomatic lam in a siah Jordan zong a si khawh chung in kan i zuam lai i, thial lo ding in kan zuamter ko hna lai tiah a chim chih. US nih Jordan hi an hawi tha ah an ruahmi hna an si.
Muslim ram lakah Jordan zong hi Nitlak ram a tanhmi le aa hawikawmmi an si. Syria, Iraq le dangdang hna i ISIS an doh hna tikah Jordan hi US hawi tha tuk an si. Jerusalem in nichuak lei kam hi Israel nih Six Day War (1967) ah Jordan in an rak lakmi a si. Israel nih an khuapi ah an telh chih, asinain Palestinian nih State an hmuh ahcun an khuapi ah hman an duhmi a si ve.
Israel nih 1967 i an rak lak lioah UN nih phungning tein a cohlanpiak hna lo. Asinain Israel nih an pe duh ve hna lo. Cuticun atu tiang an i cuh lengmang i, an buai lengmang. Khatlei in Israel nih inn an sakmi Jews miphun an umter lengmang hna. Ram kip in Jews miphun a kirmi hna umnak caah an hman. Ref: TOI.