American mipi cheukhat cu President Obama cungah an thinhung kho tuk. US ralkap thlithup document 700,000 leng Wikileaks sinah a pek hna ruangah kum 30 thong thlak ding in a bia khiahpiakmi cu Obama nih Inn Raang a chuah tak lai zarh ah luatter ding in min a thut.
An thinhung tuk i, US a kan leirawi a si ve an ti cang. Chelsea Manning hi ralkap sungthoh pakhat zong a si i, ruah lo piin a phohpian i Wikileaks sinah US Diplomatic document he ralkap lei document he tam tuk a pek diam hna. Wikileaks sinah ka pekmi nih hin vawleicung a linhsatter lai lai i, a sersiam lai tiah a hawi pa Adrian Lamo sinah a chim.
Asinain ka phuanmi hi vawleicung nih an ceih lo a si ahcun kan rawkral cang tinak a si lai a ti. Manning nih aa tinhmi hi a hmaan lomi phozar le phuan kha a si lo. US cozah thlithup riantuannak le chunglei kong vialte langhter dih a duh sawhsawhmi a si. Manning nih a phuan ruangah US he thlithup in aa pehtlaimi minung tam tuk tapung nih an tuar ve.
''Wikileaks founder Julian Assange nih a chimmi cu 'tapung nih an thahmi hna cu thah phu an si ko lai' a ti. A chim duhmi cu US he thlithup in rian a tuanmi paoh cu tapung nih an theih hna i an thahmi hna paoh cu thih phu an si ko a ti. Cu chungah Muslim ram minung tam pi an i tel hna. Al-Qaeda nih an thah hna, Taliban zong nih an thah hna.
US ralkap thlithup document a chuahmi nih indirect in nunnak tam tuk a hloh hna - Manning ruangah a si. Asinain President Obama nih luatter ding nawl a chuah cang. May 2017 in an chuah lai.
Inn Raang leiin Obama ai ah biachimtu Neil Eggleston nih a chimmi cu 'kan ram cu mi a ngaithiammi ram a si. Tei a mami le pumpeknak a ngeimi hna ca zong ah a voihnihnak caan a pemi ram a si. A luan cia kan tuanbia nih kan hmailei caan tha a kan chuh ding a si lo. Hmailei ah a kal chin lengmang ding an si' a ti.
House biachimtu Paul Ryan nih cun fak taktak i Obama khuakhan a phomh. 'Chelsea Manning lihchim le hrokhrol nih kan ram le kan minung nunnak a tihnung tukmi hmun ah a ka chiah. Obama khuakhan hi a tihnungmi a si a ti. Senator Tom Cotton nih 'leirawitu' Chelsea Manning tiah a auh ve. Obama zong US leirawitu tiah New York Post nih a cun a ti. Ref: TNYP.