October 2016 ah Kim Kardashian cu Paris i a umnak hotel ah mifir bu nih meithal he an luh hnawh i, a kut an tem hnuah takkholhnak khaan an hren i, a khaan chung thil mansung vialte an firpiak dih. Caan sau pi cung lungkuai in an um hnuah an firtu hna cu an tlaih cang hna.
Kim Kardashian thil mansung firtu ah a pumpak motor mongtu zong aa tel tiah French Police nih an chim. A hlankan tein an rak lunghrinh cangmi cu Kim neihniam minung an i tel ko lai tiah an zumh cang. French police nih an hlat lengmangmi cu a vun lang taktak cang. Kim a umnak le a kal-umnak a thei dihtu aa tel lai tiah an zumh.
Police nih an chimmi cu Kim cawlcangh hi kum 27 pa a motor mongtu nih a theih dihmi a si an ti. Paris an um paoh cun Kim chungkhar um tawnnak hotel a si ti zong a theih dih. Mifir bu an rat i, fawi tuk in an luh hnawh khawh ning le a caan rem bik lio a si ti theih ning in police nih an dawi tikah a motor mongtu cungah lunghrinhnak vialte a tla dih.
Kim thil mansung 8 million tluk hrawng an fir lioah hin minung pakhat nih Kim inn khaan chungah a minung pakhat nih a thil (DNA) a thlau takmi an hmuh. A DNA cun an dawi i, atu bantukin an theihnak hna hi a si. Pakhat hnu pakhat in an dawi hna tikah minung 17 tiang an tlaih cang hna. Kum 72, 50, 60 hrawng zong an um len; police zong nih an theih ngaimi hna an si.
An tlaihmi hna inn le thilri zong an hlat cuahmah lio hna a si. Meithal in an hmuhchiah i, an tem i, takkholhnak khan an hren ah hin Kim nih 'an ka tlaihhrem lai' tiah ka tih tuk. Zaangfahnak tein ka that hlah u. Fa ngei ka si cang' tiah a nawl len hna. Kim nih a chim thanmi cu 'ka hnulei in zei tikah dah an ka kah te lai ti lawng ka hngak cang. Ka luatnak lam a um ti lo. Atu ka ruah ah hin ka tih' tuk tiah a chim. Ref: The sun.