Chief Justice Roberts, President Carter, President Clinton, President Bush, President Obama, American ka hawile hna le ram kip miphun hna, nan cungah kaa lawm tuk. Kan ram ser than ding le kan mipi vialte caah bia kan kamhmi tlinternak ding ah atu hi American mipi kan i pum cang hna. A ra laimi kum tampi caan tiang caah, vawleicung le America caah hmun khat ah lamcan kan sial ti hna lai.
Zuamhcahnak phun kip kan tong ti hna lai. Harnak kan doh ti hna lai, asinain kan tei dih hna lai.
Kum li hnu poah ah hi cungah kan i pum hna i ningcang le dai tein cozah thlennak kan ngei, President Obama le First Lady Michelle cungah kan i lawm tuk. Anmah thawng in tluang tein thlennak kan ngeih kho. Khuaruahhar hringhran an si. Nan cungah kaa lawm tuk.
Tu chun hi a sunglawi tuk zeicatiah cozah pakhat nih cozah dang pakhat sinah uknak thlen sawhsawh lawng a si lo. Washington DC in nawlngeihnak mipi nan sinah kan pek thannak ni le caan a si. Caan sau pi chung, American mipi nih a man kan rak liam i, kan khualipi (DC) chung i mi bu tlawmpal te nih kan cozah miaknak theipar an rak zun. Washington cu a thang thluahmah nain mipi nih a rumnak kan i hrawm kho bal lo.
Politician an thangcho nain rian nih a kan chuah tak thluahmah i factory hna cu an i khar thluahmah hna. Company le NGO le cozah riantuannak kip cu him tein an um hna nain kan ram mipi cu kan rak him lo. An teinak kha nan teinak a si lo. An hlawhtlinnak kha nan hlawhtlinnnak a rak si lo. Washington DC lunglawmhnak le teinak puai an rak tuah cuahmah lioah kan ramchung kip ah chungkhar tam pi hna cu nun har in an rak um hna.
Kahin thlennak kan tho lai i, atu ah kan thok lai. Atu hi nan caan tha a si. Nanmah caan a si. Tu chun ah kaahin aa pummi nan caan a si. Ramchung in a rak kan zohmi vialte nan caan tha a si. Nihin nan ni khua caan a si. Nan puai ni le caan a si. United States of American hi nan ram a si.
Aho party kut cungah dah kan cozah a um timi hi biapi a si lo. Kan mipi kut cungah kan cozah a um maw timi hi a biapi deuhmi a si. January 20, 2017 hi kan ram uktu cu mipi an si cang timi theih ni a si cang lai. Kan ram ah theih ti lomi nu, pa vialte hna kha philh an si ti lai lo. Nan bia kan in ngeih hna. Hi bantuk tuanbia sertu hi nanmah nan si. Hi bantuk hi vawlei nih a hmuh balmi a si lo. Atu caan i a muru taktak cu a ramchung mipi caah rian a tuanmi cu a ram a si.
American nih a fale caah sianginn tha a duh, chungkhar caah innpa tha a duh i, rian tha zong a duh. Hihi cu miding fel paoh nih cun an herhmi le an duhmi a si. Asinain kan mipi tam pi hna caah a rak si naisai lo. Nu le hngakchia sifak in an um hna. Kan factory zong thlanlung bang hmun kip ah bochan awk tha loin an i then-thek dih hna. Kan sianginn system zong a chiah chin lengmang i, kan fale nih theihhngalhnak an bau chin lengmang.
Sualnak, misual bu le drug nih nunnak tam tuk an hloh i, kan ramchung thatnak vialte a fir dih. Kan ram caah a tihnunak kan thei kho bal lo. Kan ramchung thahnawnnak atu hin kan donghter lai i, kaahin kan thok lai. Ram khat kan si. An tuarnak cu kan tuarnak a si. An chunmang cu kan chunmang a si; an hlawhtlin cu kan hlawhtlin a si. Inn khat kan i hrawm i, lungthin khat kan i hrawm; kan hmuitinh pakhat a si. Tuchun biakamnak ka tuahmi hi American caah kaa pumpeknak a si.
Chan tampi chung American nun thap in ramdang kan rumter hna. Kan ralkap nun thap in ramdang ralkap tangka kan bawmh hna. Ramdang ramri kan runven i kan ramri runven kan duh lo. Ramleng ah trillion in kan dollar kan hman lioah kan ram le kan khua an tlu dih. Kan ram rumnak,thazaang le zumhnak kan thenthek dih i, ramdang kan rumter hna. Pakhat hnu pakhat in kan factory kan thial hna i, kan ram million in riantuan awk ngei loin kan chiah hna. Kan ram middle class (mirum) hna inn cia tangka kan lak i, ramdang ah kan phawtzamh dih hna. Asinain a luan cia an si; hmailei lawng kan zoh cang lai.
Tu chun kan i pum hna, nihin thok cun vision thar nih kan ram a uk cang lai. Tu ni thok cun America lawng pakhatnak a si cang lai. America pakhatnak. Chawlehthalnak kong a siah taxes kong a siah mipem kong a siah foreign affair kong a siah American riantuanmi hna ca le chungkhar hna ca lawng ah a si cang lai. Kan ramri kan runven hrimhrim lai. Runvennak nih thanchonak le thawnnak a chuahter lai.
Ka pum chungah nunnak thaw a um chung paoh cu kan dohpiak hna lai. Kan deuh hrimhrim hna lai lo. America nih a tei than lai. Cu hlan ah kan ton bal lomi le kan hmuh bal lomi teinak kan hmu lai. Kan rian kan lak than dih lai. Kan ramri kan khar dih lai. Kan rumnak kan hmuh than dih lai. Kan chunmang kan hmuh than dih lai.
Phung pahnih te lawng zulh ding kan ngei cang lai. 'Buy American le hire American' ti a si lai. Hawikawm kan kawl lai i, ramdang he thatnak kan ser lai i, kan i pehtlai lai, asinain miaknak duh ruangah kan sermi hna an si timi ruahchih in an si lai. Kan duhnak le kan lungut kha midang cungah kan khing lai lo. Zohchun awktlak tu in kan langhter lai i, mei bang kan ceuter lai. Kan hawikawm thing zong thazang kan pek hna lai i a thar zong kan ser lai; ISIS/tapung hi kan hloh dih hna lai. Vawlei hmai hrimhrim in kan hloh dih hna lai.
Kan hrihhram tha bik cu America tanh hi a si lai. Kan ram caah zumh tlak tein kan um lai. Pakhat le pakhat karlak ah dawtnak le pehtlaihnak tha kan ser lai. Ram le miphun dawtnak na ngeih hnuah cun hnachuahnak a um thiam ti lo. Bible nih pei a chim kha, 'lungrual tein Pathian fale hna um ti cu zeitluk in dah a that i, a nuamh' a ti kha.
Kan lungthin chungah a ummi lungthiang tein kan chim lai, kan i khah lonak dingfel tein kan i ceih lai. Asinain zungzal in rualremnak kan kawl lai. America lung aa rual ahcun America cu kham khawh a si lai lo. Tihmi ngei hna hlah u sih. Kan ralkap hna nih an kan runven lai, a biapi chin deuhmi cu Pathian nih a kan runven lai.
A donghnak ah, kua piin kan ruat hna lai i, chunmang ngangan kan ngei hna lai. America ah kan hmuhmi cu ram pakhat teiman a thluk chung paoh cu a nung kho timi hi a si. Bia lawng a chimmi politician kan cohlang ti hna lai lo. Pakpalawng biachim caan a si ti lo. Cawlcangh caan a ra cang. Kan tuah kho lai lo an timi paoh hna cu cohlang hna hlah u. American spirit hi zei bantuk zuamcawhnak hmanh nih a thei kho lai lo. Kan sung lai lo. Kan ram aa zuam lai i, a thangcho than lai.
American mipi, khua chung a ummi, lamhla ah a ummi, lamnai ah a ummi, tlang cungah a ummi, rili ah a ummi, ka bia rak ngai u, kan in philh hrimhrim ti hna lai lo. Na aw, nan ruahchannak, nan chunmang nih kan ram a tunmer than lai. Nan ralthatnak le nan thatnak le dawtnak nih a kan hruai zungzal lai.
Hmun khat ah kan ram kan liannganter han lai, kan ram kan rumter than lai, kan ram kan phorhlawtter than lai, kan ram kan himter than lai, Kan ram kan liannganter than lai. Nan cungah kaa lawm tuk. Pathian nih thluachuahnak in pe ko hna seh. Pathian nih America thluachuahnak pe ko seh.Nan cungah kaa lawm tuk. Pathian, America thluachuahnak pe ko.
Note: President Trump biachimmi kan lehmi a si. Biafang pakhat hnu pakhat taktak cun kan let. A tawinak le a fiannak tete in kan langhternak zawn zong a um lai.